تامىز كەڭەسىنە جينالعاندار الدىمەن كونگرەسس-حولل فويەسىندە قويىلعان كورمەنى تاماشالادى.
قالالىق ءبىلىم باسقارماسى مەن «استانا دارىنى» وڭىرلىك عىلىمي-پراكتيكالىق ورتالىعى وقۋ ءتاسىلىن جەتىلدىرۋگە باعىتتالعان جاڭا اكپاراتتىق-يننوۆاتسيالىق تەحنولوگيالاردى, قالالىق ءبىلىم بەرۋ مەكەمەلەرىنىڭ جەتىستىكتەرى مەن مۇعالىمدەر اراسىنداعى تاجىريبەلىك بايلانىستاردى كورسەتۋ ماقساتىندا كورمە گالەرەياسىن ەكىگە ءبولىپ وتكىزدى. كورەرمەندەردى پەداگوگيكالىق بولىممەن تانىستىرۋ ءۇشىن زالعا 9 LED-ەكران ورناتىلىپ, وندا دارىندى وقۋشىلاردىڭ عىلىم سالاسىنداعى جەتىستىكتەرى, ءبىلىم جۇيەسىندەگى يننوۆاتسيا, «e-learning» جوباسىنىڭ بولاشاعى, وقۋ ۇدەرىسىنە ەنگىزىلگەن «ماڭگىلىك ەل – قازاق حالقىنىڭ ۇلتتىق يدەياسى» اتتى باعدارلاما, «جاسىل ەل» پروگرامماسى, «مىڭ بالا» جانە «پەداگوگيكالىق مۇراجاي» اۆتورلىق جوبالارى, پروفيلدىك وقىتۋ, «كوپتىلدىلىك – زامان تالابى» ماسەلەسى جانە 2013-2014 وقۋ جىلىندا ۇبت-دان جوعارى ءناتيجەگە جەتىپ, ءبىلىم ساپاسى بويىنشا ۇزدىك دەپ تانىلعان 10 كوشباسشى مەكتەپ جايلى ۆيدەو-سيۋجەتتەر كورسەتىلدى. ال, تاجىريبە گالەرەياسى اياسىندا «عاسىردان عاسىرعا» ينتەللەكتۋالدىق بايقاۋىنىڭ جەڭىمپازدارى «قازاق دالاسىنداعى سوعىستار مەن قاقتىعىستار», «ەجەلگى تۇرىك ميفتەرى», «شەبەرلەر قالاسى», «الەمدىك الىپ اعاش تۋرالى اڭىز» جانە «قازاق دالاسىنداعى سوت جۇيەسى» تاقىرىبىندا تاريحي ساحنالىق قويىلىمدار قويدى. سونداي-اق, مەكتەپ وقۋشىلارى الاشتىڭ ارداقتى تۇلعالارى اباي قۇنانبايۇلى, احمەت بايتۇرسىنوۆ, شوقان ءۋاليحانوۆ پەن ىبىراي ءالتىنساريننىڭ بەينەسىن سومداپ, كورەرمەننىڭ زور ىقىلاسىنا بولەندى. ال, «كوركەمونەر» گالەرەياسىنىڭ ءسانىن كەلتىرگەن مەنەدجمەنت جانە بيزنەس كوللەدجى مەن باسقارۋ كوللەدجىندە وقيتىن شەبەر ستۋدەنتتەر قولىنان شىققان استانا ساۋلەتىنىڭ سۋرەتتەرى مەن ويۋ-ورنەك ۇندەسە تىگىلگەن ۇلتتىق كيىمدەر كورگەن كوزدىڭ جاۋىن الادى.
وتباسىلىق تاربيەلەۋ ينستيتۋتى بولسا, مازمۇنى سان ءتۇرلى وزەكتى تاقىرىپتى قامتيتىن «وتباسىلىق تاربيە» جۋرنالىن كەلۋشىلەرگە تەگىن تاراتتى جانە پسيحولوگيالىق ويىن جۇرگىزدى. ادامدار كوپ سۋرەتتىڭ ىشىنەن بىرەۋىن تاڭداپ الىپ, بەينەلەنگەننىڭ ءبارىن ءوز ويىمەن اڭگىمەلەپ بەردى. ءبىر عانا سۋرەتتى ءار ادام ارقيلى قابىلداپ, ءارتۇرلى تۇسىندىرەدى. پسيحولوگتاردىڭ ايتۋىنشا, وسى ءادىس ادامعا ءوز جان دۇنيەسىنە تەرەڭىرەك ءۇڭىلىپ, ءوزىن-ءوزى تانۋعا كومەكتەسەدى ەكەن.
كورمەدە بۇدان بولەك ءبىلىم سالاسىنا يننوۆاتسيانى ەنگىزۋمەن اينالىساتىن «Polymedia» جانە «Interactive Kazakhstan» كومپانيالارىنىڭ ونىمدەرى دە قامتىلدى. العاشقىسى – استانادا فيليالىن اشقان رەسەيلىك كومپانيا. كورمەگە ولار فۋنكتسياسى ءارتۇرلى ەكى ينتەراكتيۆتى ديسپلەي اكەلگەن: بيزنەس كەلىسىمدەرگە ارنالعان جانە مەكتەپتەگى ينتەراكتيۆتى تاقتانىڭ ورنىن الماستىراتىن ديسپلەي. رەسەيدە بۇل تەحنولوگيالار ءبىلىم سالاسىندا كەڭىنەن قولدانىلسا, استانادا ازىرشە تەك نازارباەۆ ۋنيۆەرسيتەتىندە بار ەكەن. اتى اتالعان ەكىنشىسى قازاقستانعا ينتەراكتيۆتى تاقتالاردى ورناتقان ەڭ العاش كومپانيا بولاتىن. ال, بۇگىنگى كۇنى مەملەكەتىمىزدەگى مەكتەپتەردىڭ باسىم كوپشىلىگى فيزيكا, حيميا, بيولوگيا پاندەرىنىڭ لابوراتوريالىق ساباقتاردى ءتيىمدى جۇرگىزۋ ءۇشىن بۇل كومپانيانىڭ ساندىق زەرتحانا جۇمىستارى قۇرىلعىلارىن دا بەلسەندى پايدالانادى. «كورەيالىق ارىپتەستەرىمىز وندىرگەن تەلەديدار, ەكران ءارى كومپيۋتەر قىزمەتىن اتقاراتىن پانەل اكەلدىك. قاراعاندىداعى «بولاشاق» كوللەدجى بۇعان تاپسىرىس بەردى. وسى كورمەگە قاتىسۋ ارقىلى بۇل پانەلدى استانادا تانىستىرىپ وتىرمىز. سونىمەن بىرگە, مۋلتيمەديالىق پوديۋمدى جۇرت نازارىنا ۇسىندىق. پوديۋمنان الىسقا ۇزاماي, سەنسورى ارقىلى ەكراندا كورسەتىلەتىن ساباقتى تولىق باسقارۋعا بولادى. دىبىسىن باسقارۋ, ءتۇسىن وزگەرتۋ, جازۋ قوسۋ سياقتى ت.ب مۇمكىندىكتەرى بار. مەكتەپتەردە دە, ۇلكەن جيىنداردا دا مۇنى قولدانۋ ىڭعايلى» دەدى «Interactive Kazakhstan» كومپانياسىنىڭ ديرەكتورى نۇرلان قۇراقباي. سونىمەن قاتار, وقۋشىلاردى پانگە قىزىقتىرىپ, ساباقتى 3D فورماتىندا وتكىزۋگە دە بولادى ەكەن. ۆيدەوعا جازىلعان وقۋ ماتەريالدارىن ءتالىم الۋشىلار 3D-كوزىلدىرىگىمەن ارنايى تاقتادان كورە الادى. بۇل جاراتىلىستانۋ باعىتىنداعى دارىستەردى ەستە ساقتاۋدىڭ ەڭ ءتيىمدى جولى بولار ەدى.
كورمەدە ۇبت دايىندىعىنا ارنالعان تەست كىتاپشالارى مەن وقۋ كىتاپتارى دا ساتىلدى. ولارعا سۇرانىس وتە كوپ ەكەندىگىن بايقاۋ دا قيىنعا سوقپادى. تامىز كەڭەسى اياقتالعان سوڭ, مۇعالىمدەر سول جەردەگى بۋما-بۋما كىتاپتاردى ارقالاپ, كوڭىلگە ءتۇرلى ماقسات-جوسپارلاردى قوندىرىپ, وقۋ جىلىنا جاڭا سەرپىنمەن كەتىپ بارا جاتقانداي كورىندى.
ءمادينا جاقىپ
