حالىقارالىق گروسسمەيستەردى قابىلدادى
مەملەكەت باسشىسى قاسىم-جومارت توقاەۆ استانا قالاسى شاحمات فەدەراتسياسىنىڭ قۇرمەتتى پرەزيدەنتى دينارا سادۋاقاسوۆانى قابىلدادى.
پرەزيدەنت قاسىم-جومارت توقاەۆ پەن شاحماتتان ايەلدەر اراسىندا حالىقارالىق گروسسمەيستەر دينارا ءسادۋاقاسوۆا ەلىمىزدە شاحماتتى دامىتۋ جونىندە پىكىر الماستى.
مەملەكەت باسشىسىنا دينارا سادۋاقاسوۆا ەلىمىزدە شاحماتتىڭ تانىمالدىلىعىن ارتتىرۋ ءۇشىن اتقارىلىپ جاتقان جۇمىستار جانە كەلەشەكتەگى جوسپارى جونىندە باياندادى. ونىڭ ايتۋىنشا, بالالار اراسىندا شەبەرلىك ساعاتتارى مەن كۆاليفيكاتسيالىق تۋرنيرلەر ۇدايى ۇيىمداستىرىلىپ تۇرادى.
پرەزيدەنت دينارا ءسادۋاقاسوۆانى بىلتىر جىل سوڭىندا الماتىدا وتكەن الەم چەمپيوناتىندا شاحماتتىڭ راپيد تۇرىنەن كۇمىس مەدالعا قول جەتكىزۋىمەن تاعى دا قۇتتىقتاپ, شاحماتشىلارعا مەملەكەت تاراپىنان جان-جاقتى قولداۋ كورسەتىلەتىنىن اتاپ ءوتتى. سونداي-اق قاسىم-جومارت توقاەۆ بەلگىلى شاحماتشىعا الداعى جارىستاردا ساتتىلىك تىلەدى.