iKOMEK109 قالالىق مونيتورينگ جانە جەدەل ارەكەت ەتۋ ورتالىعى ەلوردا تۇرعىندارىمەن جانە قوناقتارىمەن كەرى بايلانىس سەرۆيسىن جاقسارتۋ ماقساتىندا بىرىڭعاي بايلانىس ورتالىعىنا 1-0-9 قىسقا ءنومىرى ارقىلى بەرىلگەن وتىنىشتەر بويىنشا سمس-حابارلاندىرۋ قىزمەتىن ىسكە قوسادى.
بۇل سمس-حابارلاندىرۋلار تۇرعىنداردى وتىنىشتەردىڭ ورىندالۋ دارەجەسى تۋرالى ۋاقىتىلى حاباردار ەتۋگە مۇمكىندىك بەرەدى. ءوتىنىشتىڭ اتقارىلۋ دارەجەسىن ەگجەي-تەگجەيلى قاراۋ ءۇشىن قالانىڭ iKOMEK.city پورتالىنا ءوتۋ قاجەت. ءوتىنىش شەشىمىمەن تانىسقاننان كەيىن تۇرعىنعا پىكىر قالدىرىپ, ورىندالعان جۇمىستار ساپاسىن باعالاۋ ۇسىنىلاتىن بولادى.
سونداي-اق ءاربىر وتىنىشكە كىرۋ كودى كەلەدى, ول ۋاقىت وتە كەلە ءوتىنىشتىڭ ورىندالۋ دارەجەسىن قايتا قاراۋعا مۇمكىندىك بەرەدى. ول ءۇشىن پورتال ارقىلى ءوتىنىشتىڭ SD مەن كىرۋ كودىن ەنگىزىپ, اتقارىلۋ دارەجەسىن تەكسەرۋ قاجەت. بۇل جاڭاشىلدىق 1-0-9 قىسقا نومىرىنە ۇيالى تەلەفوننان قوڭىراۋ شالۋ ارقىلى ءوتىنىش بەرۋدى ءجون كورەتىن تۇرعىندارعا ونىڭ شەشىممەن ونلاين رەجىمدە تانىسۋعا مۇمكىندىك ۇسىنادى. ەستەرىڭىزگە سالا كەتەيىك, ءوتىنىشتى بالاما كوزدەر (WhatsApp جانە Telegram چات-بوتتارى, iKOMEK109 ءموبيلدى قوسىمشاسى نەمەسە ەلوردا اكىمدىگىنىڭ سايتى) ارقىلى بەرگەن جاعدايدا ءوتىنىشتىڭ ورىندالۋ دارەجەسى تۋرالى حابارلاندىرۋلاردى تۇرعىندار اۆتوماتتى تۇردە الاتىن بولادى.
