پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا ەپيدەمياعا قارسى شارالاردى ىسكە اسىرۋ بارىسى قارالدى.
دەنساۋلىق ساقتاۋ ءمينيسترى الەكسەي تسوي COVID-19 ينفەكتسياسىنىڭ راستالعان جاعدايلارىنىڭ تاۋلىكتىك ءوسىمى 1,2 پايىزدان اسپايتىنىن, بۇل كورسەتكىش كۇن سايىن تومەندەپ كەلە جاتقانىن باياندادى. قازىرگى ۋاقىتتا ەمدەلىپ شىققان ادامدار بارلىق اۋرۋ جۇقتىرعانداردىڭ 68 پايىزىن قۇرايدى, قالعان ناۋقاستار قاجەتتى مەديتسينالىق كومەك الۋدا. اۋرۋحانالاردىڭ جۇكتەمەسى 36 پايىزعا تومەندەدى.
اپتانىڭ قورىتىندىسى بويىنشا ينفەكتسيانىڭ رەپرودۋكتيۆتىك دەڭگەيىنىڭ 1-دەن تومەن بولۋى اتىراۋ, اقتوبە, ماڭعىستاۋ, قىزىلوردا, شىعىس قازاقستان, جامبىل, تۇركىستان, پاۆلودار وبلىستارى مەن نۇر-سۇلتان, شىمكەنت, الماتى قالالارىندا تىركەلگەن. سونىمەن قاتار قوستاناي مەن اقمولا وبلىستارىندا ينفەكتسيانىڭ رەپرودۋكتيۆتىك دەڭگەيى 1-دەن جوعارى بولۋى انىقتالعان. ۇكىمەت باسشىسى وسى وڭىرلەردىڭ اكىمدەرىنە ەپيدەمياعا قارسى شارالاردى كۇشەيتۋدى تاپسىردى.
– اۋرۋ جۇقتىرعان ازاماتتاردى ەمدەۋ جانە ۆيرۋستىڭ تارالۋىن تومەندەتۋ جونىندەگى قارقىندى جۇمىستى, ونىڭ ىشىندە سانيتارلىق نورمالاردى, كارانتين تالاپتارىن ازاماتتاردىڭ ساقتاۋ قاجەتتىگى تۋرالى ءتۇسىندىرۋ جۇمىستارىن جالعاستىرۋ كەرەك, – دەدى ا.مامين.
پرەمەر-مينيستر قازىرگى كەزدە الەمدىك ستاتيستيكا 126 مەملەكەتتە اۋرۋ جۇقتىرعاندار سانىنىڭ جاڭا ءوسىمىن كورسەتىپ وتىرعانىن, وسىعان بايلانىستى كۇزدە پايدا بولۋى مۇمكىن پاندەميانىڭ جاڭا تولقىنىنا دايىن بولۋ كەرەكتىگىن ءارى ونىڭ الدىن الۋ ءۇشىن بارلىق بەلگىلەنگەن تالاپتاردىڭ ساقتالۋىن قامتاماسىز ەتىپ, جوسپارلانعان شارالار كەشەنىن ىسكە اسىرۋ قاجەتتىگىن اتاپ ايتتى.
