يندۋستريالاندىرۋ اپتالىعىنىڭ ءۇشىنشى كۇنى – 1 شىلدە ايماقتاردىڭ قوسقان ۇلەسىنە ارنالادى. وسى ورايدا, سوڭعى ءۇش جىلدا ايماقتاردا يندۋستريالاندىرۋ كارتاسى بويىنشا 537 كاسىپورىن اشىلىپ, جاڭا 142 ءونىم ءتۇرى شىعارىلا باستاعانىن ايتا كەتكەن ءجون. وعان استانامىز دا ايتارلىقتاي اتسالىستى.
استانادا سەندۆيچ-پانەل شىعاراتىن «كروۆليا نس», ءدارى-دارمەك شىعاراتىن «حيمفارم-استانا» زاۋىتى, «ابۋ دابي پلازا» كوپ فۋنكتسيونالدى كەشەنىنىڭ قۇرىلىسى, ەسىل-نۇرا ارناسىن قايتا جاڭعىرتۋ 2010-2014 جىلدارعا ارنالعان يندۋستريالاندىرۋ كارتاسىنا قوسىلعان. سونىمەن قاتار ۇلتتىق عارىش اگەنتتىگىنىڭ دامۋ باعدارلاماسى اياسىندا جۇزەگە اسىرىلىپ جاتقان «KazSat» جەرسەرىك ارقىلى بايلانىس جانە حابار تاراتۋ جۇيەسىن, عارىش اپپاراتتارىن جيناۋ-سىناقتان وتكىزۋ كەشەنى قۇرىلىسىن, جەردى قاشىقتىقتان بارلاۋ-باقىلاۋ جۇيەسىن جاساۋدى ەلىمىزدىڭ يننوۆاتسيالىق مەگا-جوبالارىنىڭ قاتارىنا جاتقىزۋعا بولادى.
ەلىمىزدىڭ اكىمشىلىك ورتالىعى ەكەندىگىنە قاراماستان, استانانىڭ ونەركاسىپ, وڭدەۋ سالالارىندا العاشقى بەستىكتەن كورىنۋى كوپ نارسەنى اڭعارتادى. ماسەلەن, العاشقى توقساندا استانادا وندەۋشى كاسىپورىنداردىڭ وندىرگەن ءونىمىنىڭ مولشەرى 62,2 پايىزعا ارتتى. ال ەلىمىزدە بۇرىن-سوڭدى يگەرىلمەگەن 142 جاڭا ءونىم اراسىندا استانادا شىعارىلاتىن «تالگو» جولاۋشىلار ۆاگوندارى, لوكوموتيۆ پەن ەلەكتروۆوز, جارىقديودتى شام, فوتوەلەكترلىك مودۋل ءوندىرىسى بار.
يندۋستريالاندىرۋ كارتاسى تۋرالى تاراتا ايتساق, تەك بىلتىردىڭ وزىندە جاڭا ونەركاسىپ ورىندارى 913,4 ملرد تەڭگەنىڭ ءونىمىن ءوندىردى. ال وڭدەۋشى سالاعا سوڭعى كەزدەرى ىسكە قوسىلعان كاسىپورىندار 8%-داي ۇلەس قوسىپ وتىر. ەكونوميكانىڭ نەگىزگى كورسەتكىشتەرىنىڭ ءبىرى – ەڭبەك ونىمدىلىگى حيميالىق ونەركاسىپ سالالارىندا 1,8 ەسە, ماشينا جاساۋ, فارماتسەۆتيكا مەن جەڭىل ونەركاسىپ 1,3 ەسە, ءتۇرلى مينەرالدىق ونىمدەردى شىعارۋ وندىرىسىندە 1,2 ەسە ارتتى. سوڭعى ءۇش جىلدا ىسكە قوسىلعان 537 ءوندىرىس نىسانى 2,1 ترلن تەڭگەنىڭ ءونىمىن ءوندىردى, 40900 ادامدى جۇمىسپەن قامتىدى.
البەتتە, مۇنىڭ ءبارى بەس جىل بويعى ۇزدىكسىز, ىجداھاتتى جۇمىستىڭ ارقاسىندا اتقارىلىپ وتىر. ارتقا قارايلاساق, اۋقىمدى رەفورمالاردىڭ جۇرگىزىلگەنىنە كوزىمىز جەتەدى. مىسالى, ەكونوميكانىڭ باسىم باعىتتارىن دامىتۋ بويىنشا سالالىق باعدارلامالار, بيزنەستى قولداۋ, ايماقتاردى دامىتۋ باعدارلامالارى, يندۋستريالاندىرۋ كارتاسى سياقتى ماڭىزدى قۇجاتتار قابىلداندى. ەلۋگە جۋىق زاڭعا وزگەرىس ەنگىزىلدى, «يندۋستريالدىق-يننوۆاتسيالىق قىزمەتتى مەملەكەتتىك قولداۋ تۋرالى», «ەركىن ەكونوميكالىق ايماقتار تۋرالى», «قۋات تيىمدىلىگى مەن قۋات ۇنەمدەۋشىلىك تۋرالى» سىندى تۇرالاپ قالعان تۇستارعا قوزعاۋ سالعان جاڭا زاڭدار كۇشىنە ەندى. ينۆەستورلاردى تارتۋ, ەكسپورتتاۋشىلاردى دەمەۋ, يننوۆاتسيالىق تەحنولوگيالاردى, شاعىن جانە ورتا بيزنەستى دامىتۋ بويىنشا بىرقاتار باتىل شارۋالار قولعا الىندى.
اسىرەسە, ناقتى وندىرىسكە نەگىزدەلگەن ەكونوميكا قۇرۋدىڭ كوپ دەڭگەيلىلىگىن ايرىقشا اتاپ وتكەن ءجون. ماسەلەن, وتىن-ەنەرگەتيكا, پايدالى قازبالار, مەتاللۋرگيا, كولىك-لوگيستيكا سالاسىنداعى ستراتەگيالىق ماڭىزدى ءىرى جوبالار «سامۇرىق-قازىنا» ۇلتتىق ءال-اۋقات قورىنىڭ جەتەكشىلىگىمەن جۇزەگە اسىرىلۋدا. وعان بالاما رەتىندە مەملەكەت ەل ىشىندەگى جانە كەدەندىك وداق, ورتالىق ازيا سياقتى تاياۋداعى تۇتىنۋشى نارىقتارىنا لايىقتالعان شيكىزاتتىق ەمەس سالاداعى ونەركاسىپتەرگە, يمپورتتى الماستىراتىن ءونىم ءوندىرىپ, شەتەلدەگى وزىق تەحنولوگيالاردى ەلىمىزگە ترانسفەرت جاساعىسى كەلەتىن شاعىن جانە ورتا بيزنەس سۋبەكتىلەرىنە قولداۋ كورسەتۋدە. ونداي قارجىلاي كومەكتەن پوستيندۋستريالدىق كەزەڭگە ءوتۋ جولىندا كوممەرتسيالاندىرۋ كادەسىنە جارايتىن عىلىمي-تەحنولوگيالىق ىزدەنىستەر دە تىس قالمايدى.
ءادىل الاش
