Nur Otan پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن ىسكە اسىرۋدىڭ «جول كارتاسىندا» ەلوردادا 107 تارماق قاراستىرىلعان. سونىڭ ىشىندە شاعىن جانە ورتا بيزنەستى دامىتۋدىڭ باسىم باعىتتارى بار.
جاقىندا نۇر-سۇلتان قالاسى ماسليحاتىنداعى Nur Otan پارتياسى فراكتسياسىنىڭ مۇشەلەرى «جول كارتاسىنىڭ» ورىندالۋىن باقىلاۋ اياسىندا №1 يندۋستريالدى پارك اۋماعىندا كوشپەلى كەڭەس وتكىزدى.
قالالىق ءماسليحات حاتشىسى ەرلان كاناليموۆتىڭ ايتۋىنشا, يندۋستريالدى پاركتە «قاراپايىم زاتتار ەكونوميكاسى» باعدارلاماسى بويىنشا 2 جاڭا ءوندىرىس ورنى قۇرىلدى. جالپى قۇنى 6,5 ملرد تەڭگەنىڭ 5 جوباسى قارجىلاندىرىلدى. «بيزنەستىڭ جول كارتاسى» باعدارلاماسى شەڭبەرىندە پايىزدىق مولشەرلەمەنى سۋبسيديالاۋ بويىنشا 18,2 ملرد تەڭگەنىڭ 286 جوباسى ماقۇلداندى.
«ەڭبەك» باعدارلاماسى اياسىندا ءىسىن جاڭا باستاعان كاسىپكەرلەرگە جالپى العاندا 389 گرانت, سونىڭ ىشىندە «جاستار» ساناتىنداعى 108 جۇمىسسىزعا گرانتتار بەرىلدى. كارانتيندىك شارالاردىڭ سالدارىنان كوبىرەك زيان شەككەن سالالارداعى كاسىپكەرلەرگە 847 ملن تەڭگەنى قۇرايتىن 60 جەڭىلدەتىلگەن نەسيە بەرىلدى. 110 ملن تەڭگەگە 8 جوبا ماقۇلداندى.
كوشپەلى كەڭەس بارىسىندا دەپۋتاتتار ونەركاسىپتىك ايماقتى ارالاپ, اۋماقتاعى زاۋىتتار مەن كومپانيالاردىڭ جۇمىسىمەن, يندۋستريالدى پارككە جىلۋ جۇيەسىن تارتۋ ىسىمەن تانىستى. مەردىگەرلەردىڭ سوزىنشە, ءتيىستى جۇيە قاراشا ايىنىڭ اياعىندا پايدالانۋعا بەرىلۋى كەرەك.
