ەلورداداعى اسكەري-تاريحي مۋزەيدە «رۋحاني جاڭعىرۋ» باعدارلاماسى جانە جاستار جىلىنىڭ اياسىندا جاس سۋرەتشى نۇرشۇعا قيقىموۆانىڭ «ۇلى دالا مادەنيەتىنىڭ كوكجيەگى» اتتى العاشقى جەكە كورمەسى اشىلدى. اۆتوردىڭ پەيزاج, ناتيۋرمورت, پورترەت سىندى جانرلارى ءار الۋان جيىرماعا تارتا كارتيناسى قويىلعان كورمە 23 تامىزعا دەيىن جالعاسادى.
نۇرشۇعا – ءالى ىزدەنىس ۇستىندە جۇرگەن سۋرەتشى. كەسكىندەمە ونەرىن زەرتتەپ, سۋرەت سالۋدىڭ ءارتۇرلى تەحنيكالارىن ارالاستىرىپ, ەكسپەريمەنت جاساۋعا اۋەس. «جانىما ناقتى مىنا جانر جاقىن دەپ ايتا المايمىن. بەلگىلى ءبىر تاقىرىپتى دا تاڭدامايمىن. ويىما نە كەلەدى, سونى كەنەپ بەتىنە تۇسىرەمىن» دەيدى سۋرەتشى. شىعارماشىل جاستاردىڭ «شابىت» حالىقارالىق فەستيۆالىنە بىرنەشە رەت قاتىسىپ, ديپلومانت اتانعان ول اتالمىش بايقاۋ ۇلكەن تاجىريبە سىيلاعانىن ايتادى.
كارتينالارىندا اڭىزدار جەلىسى مەن كەيىپكەرلەرى, ۇلتتىق ونەرىمىزگە, سالت-داستۇرىمىزگە, قازاقتىڭ تۇرمىسىنا ءتان ەلەمەنتتەر كوپ كەزدەسەدى. ماسەلەن, «كۇي» اتتى تۋىندىسىندا دومبىرا, قوبىز, داۋىلپاز, جەتىگەن سەكىلدى ۇلت اسپاپتارىن بەينەلەگەن. «كۇي تىڭداعاندى جاقسى كورەم. سونىڭ ىشىندە توكپە كۇيلەردەن, قۇرمانعازى بابامىزدىڭ «اداي» جانە «بالبىراۋىن» كۇيلەرىنەن شابىت الامىن. «ۇلىتاۋ» توبىنىڭ ورىنداۋىنداعى كۇيلەردى دە ءسۇيىپ تىڭدايمىن» دەيدى نۇرشۇعا.
بۇعان دەيىن بىرنەشە مارتە توپتىق كورمەلەرگە كارتينالارى قويىلعان جاس سۋرەتشىنىڭ العاشقى جەكە كورمەسىنىڭ اشىلۋىنا قاتىسقان سۋرەتشىلەر وداعىنىڭ نۇر-سۇلتان قالاسى فيليالىنىڭ توراعاسى جانۇزاق ءمۇساپىر, بەلگىلى قىلقالام شەبەرى تىلەۋجان باتانوۆ وعان ونەردە اق جول تىلەدى. نۇرشۇعا بولسا, ءبىر عانا ونەرمەن شەكتەلمەي, قازاق بەينەلەۋ ونەرىنىڭ تانىمال تۇلعالارى اۋباكىر ىسمايىلوۆ پەن گۇلفايرۋز ىسمايىلوۆا سياقتى كينوعا تۇسسەم ەكەن دەپ تە ارماندايدى.
