سول جاعالاۋداعى كەلىستى كوشەگە ۇلت كوسەمى, الاش ارداقتىسى ءاليحان بوكەيحان ەسىمى بەرىلگەن. بۇرىن باس كوشەلەر لەنين, ماركس ەسىمىن يەلەنۋشى ەدى, ەندى زامان وزگەرگەن. كوسەمدەر دە وزگەرگەن. الايدا كوسەمگە تەلىگەن كوشەمىز كوڭىل كونشىتپەي تۇر. نەگە؟
ماڭگىلىك كەپتەلىستەن كوز اشپايتىن ء(بىر سەبەبى ءۇش جولاق جول باس پروكۋراتۋرا جانىنداعى جەراستى وتكەلىنە كەلگەندە ەكى جولاققا اينالادى) ماڭگىلىك ەل داڭعىلىنا قاپتالداس جاتقان كوشە – وسى بوكەيحان. ونىڭ جوندەلىپ جاتقان بولىگى – بۇقار جىراۋ مەن ۇلى دالانى قوساتىن تۇسى بىتۋگە تاياۋ. بىراق جۇرگىزۋشىلەر قۋانا قويمايدى-اۋ. سوناۋ فاريزا وڭعارسىنوۆا كوشەسىنەن دە ءارى باستاۋ الىپ تۇڭعىش پرەزيدەنت كىتاپحاناسىنا دەيىن سوزىلاتىن ۇزىن كوشە – نەگىزگى ارتەريا ەكى جولاق قانا بولاتىن سىڭايلى. سۋرەتكە كوز سالساڭىز, بۇعان كوزىڭىز جەتەدى. اناۋ جول جوندەگىش ماشينا كولىك جولىن ەمەس, جانىنداعى تۇرعىن ۇيگە ارنالعان كولىك تۇراعىن سالىپ جاتىر. ءبىر-بىرىنە مىنگەسكەن نيۋ-يوركتى ەسكە تۇسىرەتىن تۇرعىن ۇيلەر ىرگەسىنەن كولىك تۇرماق ادام ازەر وتەدى. ەندى ءۇش-ءتورت ايدا ەسكى دە جاڭا قازاقستاننىڭ كۇلشەلى دە سۇيىكتى قۇرىلىس كومپانيالارى سالىپ جاتقان وسى ۇيلەر بىتەدى, سوسىن مىنا ىرگەدەگى كوشەلەردىڭ اعىنى تاعى دا ارتادى. ال ءبىز جيىرما ەكىنشى عاسىر قارساڭىندا سول جاعالاۋداعى بوس جەرگە سالىپ جاتقان جاڭا استانامىزدىڭ باس كوشەسىن ەكى جولاقتى ەتكەنىمىز قالاي بولادى؟ نەگە بۇلاي ىستەدىك؟ ماماندار, عالىمدار قالا قۇرىلىسى جانە كوشەنى جوبالاۋعا قاتىسپاعان با؟ قوعامدىق كەڭەس پەن جەلىدەگى بەلسەندى دەپۋتاتتار قالاي نازار اۋدارماعان؟ مالشىنىڭ بالالارى قالا سالا المايدى دەپ دۇشپاندار تابالاپ جۇرمەي مە؟ قويشى, ايتەۋىر, سۇراق كوپ. سۇراق قويا بەرگەنمەن شەشىمى تابىلماسا, ودان بوكەيحانمەن جۇرەتىن قاراپايىم جۇرگىزۋشى مەن جۇرگىنشىگە نە پايدا؟
قىسقاسى, بوكەيحان كوشەسى تولىق قوسىلعانىمەن, جانىنداعى ماڭگىلىك ەل داڭعىلىنداعى كەپتەلىسكە ەشقانداي اسەر ەتپەيتىن بولىپ تۇر. وكىنىشتى…
