كوش باسىنا «قايرات» شىقتى
فۋتبولدان قازاقستان چەمپيوناتىنىڭ پرەمەر-ليگاسىندا جۇلدەلەر ءۇشىن شەشۋشى ويىندار وتۋدە.
ۇلتتىق بىرىنشىلىكتىڭ جۇلدەلەرى ءۇشىن تالاسقا ءتۇسىپ جاتقان التىلىقتىڭ اراسىنان «قايرات» ءبىرىنشى رەت كوش باسىنا شىعىپ وتىر. الماتىلىقتاردىڭ ەنشىسىندە 26 ويىننان كەيىن 30 ۇپاي بار. ال تۋرنير كەستەسىنىڭ ەكىنشى ساتىسىنا ورنالاسقان «استانا» 24 ويىننان كەيىن 26 ۇپايعا يەلەنگەن. ەلىمىزدىڭ ءتورت دۇركىن چەمپيونى «اقتوبە» ازىرگە ءۇشىنشى ورىندا كەلەدى. كوش باسىنداعى وسى ۇشتىكتى قۋىپ جەتۋ ءۇشىن «قايسار», «شاحتەر» جانە «ورداباسى» كوماندالارى دا بارىن سالاتىنى انىق.
ال پرەمەر-ليگادا قالۋ ءۇشىن جانتالاسىپ جاتقان التىلىقتىڭ اراسىندا «توبىل» مەن «سپارتاك» كوماندالارىنىڭ جاعدايى ءماز ەمەس. بۇل كوماندالار نەبارى 14 ۇپايدان جيناقتاعان. سونداي-اق ەلىمىزدىڭ بەس دۇركىن چەمپيونى (!) «ەرتىس» تە (17 ۇپاي) قاۋىپتى شەكتە تۇر.
چەمپيوناتتىڭ اياقتالۋىنا التى تۋر قالدى, ياعني, ءار كوماندا ەندى 5-6 ويىننان وتكىزەدى. دەمەك, جۇلدە ءۇشىن دە, جوعارى توپتا قالۋ ءۇشىن دە ناعىز «جان الىپ, جان بەرىسەتىن» ويىندار الدا دەپ ويلايمىز.
دايىنداعان:
عالىم قوجابەكوۆ