ءومىر سۇرگەن ورتادا جولدىڭ اتقاراتىن قىزمەتى ۇشان-تەڭىز. ەكونوميكانىڭ قۋاتتى كۇشىنە اينالعان وسى كۇرەتامىردى «ساۋىقتىرۋدى» مەردىگەر كومپانيالار جىلدا ءوز موينىنا العان. جىلدا دەۋىمىزدىڭ دە سەبەبى بار. كەڭەس داۋىرىنەن بەرى ءتىس تە, قول دا باتپاعان ءىس سوڭعى جىل بەدەرىندە ءساتتى ورايىن تاۋىپ جاتىر.
استانا بار قالاعا ۇلگى بولۋى ءتيىس. سىرت كوز الدىمەن ونىڭ كەلبەتىنە, سوسىن ينجەنەرلىك ينفراقۇرىلىمنىڭ ساپاسىنا نازار اۋدارادى. بىلتىر جىلۋ بەرۋ ماۋسىمىندا جۇرتتى ەلەڭ ەتكىزەرلىك وقىس وقيعا ورىن العان جوق. بيىل دا قىس قاھارىنا دايىندىق ماسەلەسى جەرگىلىكتى بيلىكتىڭ قىراعى نازارىندا تۇر. جوسپار بويىنشا بىرقاتار جەرلەردە جىلۋ قۇبىرلارى اۋىستىرىلىپ, قىزۋ جۇمىس قاس قارايعانشا جالعاسۋدا. قالامىزدىڭ اقان سەرى كوشەسىندە ءۇش بىردەي – جول, جارىق, جىلۋ ماسەلەسى جاقىن ارادا ءوز شەشىمىن تابادى. بۇل جەرگە سوناۋ كەڭەس داۋىرىنەن بەرى جوندەۋ جۇمىسى جۇرگىزىلمەگەن ەكەن. ارينە, كەيبىر جولىن جاماپ-جاسقاعان. ال كوشەدەگى ورتالىق جىلۋ قۇبىرى مۇلدە جارامسىز بولىپ قالىپتى. – جولدىڭ ساپالى بولۋىنا بىرنەشە فاكتور تىكەلەي اسەر ەتەدى. ەگەر, جارىلعان جەردى عانا جوندەسەڭ, وندا ول ەكى-ءۇش جىلدا-اق سىر بەرە باستايدى. كوپتەگەن مەردىگەر كومپانيالار وسىلاي كوز الداۋ جاساپ, اقىر سوڭى تاياق جەيدى. ءبىز قازىر ساپاسى سىن كوتەرمەيتىن 300 مەتر جولدىڭ اسفالتىن تۇگەلىمەن اۋدارىپ, تەگىستەدىك. ودان كەيىن قاجەتتى ماتەريالدى توسەيمىز دە, بەتىنە اسفالت توسەيمىز. اۋا رايىنىڭ جىلى بولۋى دا جۇمىستىڭ ويداعىداي بولۋىنا سەپتىگىن تيگىزۋدە. قىركۇيەك ايىنىڭ باسىندا جوندەۋدى تولىق اياقتايمىز,– دەيدى «بولاشاق جولدارى» جشس شەبەرى تالعات بيباتىر.
«ادىلەت» جشس بۇل جەردە ەلەكتر جارىعىن تارتۋمەن اينالىسۋدا. كىسى بويلامايتىن تەرەڭدىككە كابەل توسەپ جاتىر. وعان قاتپارلاسا جاڭا قۇبىرلار سالىنۋ ۇستىندە. شيراق قيمىلدى ەڭبەككەرلەر كۇننىڭ ىستىعىن دا ەلەمەدى. ءبىز ساعات 13:30-دا جوعارىدا اتى اتالعان سەرىكتەستىڭ ۋچاسكە باستىعى اسىلان نازاروۆتى جۇمىس باسىنان جولىقتىردىق. – نەسىن ايتاسىز, ەلەكتر جەلىلەرى ابدەن توزىپ بىتكەن. وسى اۋماقتاعى تۇرعىندار بىزگە كەلىپ العىستارىن جاۋدىرۋدا. ەندىگى جەردە ولار «جالپ» ەتىپ ءسونىپ قالاتىن جارىقتان تيتىقتامايتىن بولدى. بۇگىندە ءبىز 530 مەترگە ەلەكتر جەلىسىن جۇرگىزدىك. تاعى وسىنداي كولەمگە جەلى تارتامىز. ءوزىڭىز بايقاعانىڭىزداي, تاماق ءىشۋدى دە ۇمىتتىق,–دەيدى ول جايدارى كەيىپتە.
راسىندا, ءجۇزىن كۇن شالعان جىگىتتەر ەشكىمدى ەلەر ەمەس. بار بولعانى ون ەكى ادام الگى مەجەلى جەرگە ەلەكتر كابەلىن توسەپ جاتىر. ەكى كۇندە وسى جۇمىستى اياقتاپ, كەلەسى اۋماققا اۋىسادى. تۇرعىن ۇيلەر جانىنداعى مەكتەپ, ەمحانا دا بولاشاقتا وسى جاڭارعان جەلىدەن قۋات الاتىن بولادى. جالپى, استانانىڭ بيىلعى قىسقا دايىندىعى تالاپقا ساي دەسەك قاتەلەسپەسپىز. ويىمىزدى نىقتاۋ ءۇشىن استانا قالالىق پيك قاۋىمداستىعىنىڭ توراعاسى مەيزامبەك كەنجەباەۆقا حابارلاستىق. – قالامىز قازىر جىلۋ بەرۋ ماۋسىمىنا 98 پايىز دايىن. تامىز ايىنىڭ اياعىندا جوسپاردى ورىنداپ شىعامىز. ال جاڭاعى ءسىز ايتقان اقان سەرى كوشەسىندە بۇرىن-سوڭدى بولماعان جۇمىس قولعا الىندى. جاۋاپتى مەردىگەرلەر ونداعى كۇردەلى جوندەۋدى تامىز ايىندا تولىق اياقتايدى,–دەيدى ول .
باس قالانىڭ تىرشىلىگىن كۇندەلىكتى قاداعالاپ وتىرعان ازاماتتىڭ سوزىنە ءبىز دە سەنىم ارتتىق.
ءامىرحان الماعانبەتوۆ
