«استانا وپەرا» تەاترىندا كورنەكتى كۇيشى, ديريجەر, ۇستاز, قازاقستاننىڭ حالىق ءارتىسى رىسباي عابديەۆتىڭ تۋعانىنا 85 جىل تولۋىنا ارنالعان «قوس ىشەكتىڭ قۋاتى» اتتى ەسكە الۋ كەشى ءوتتى. مادەنيەت جانە سپورت مينيسترلىگىنىڭ قولداۋىمەن وتكەن كەشتە باتىس قازاقستان كۇيشىلىك مەكتەبى كورنەكتى وكىلدەرىنىڭ توكپە كۇيلەرى شالقىدى.
بۇل تەكتەن-تەك ەمەس. رىسباي عابديەۆتىڭ كىندىك قانى كۇي اتاسى – قۇرمانعازىمەن ءبىر توپىراققا تامعان. كۇي الىپپەسىن اعاسى عالىمجاننان ۇيرەنىپ, 15 جاسىندا الماتىعا بارىپ, رەسپۋبليكالىق كونكۋرسقا قاتىسادى. سول جەردە ونەرىمەن اتاقتى نۇرعيسا تىلەنديەۆ پەن كۇي اناسى – دينا نۇرپەيىسوۆانىڭ كوزىنە تۇسەدى.
مۋزىكالىق ءبىلىمدى الماتى مۋزىكا ۋچيليششەسى مەن شىمكەنت ونەر ينستيتۋتىنان الدى. ءوزى دە ۇزاق جىل ۇستازدىقپەن اينالىسىپ, تالاي شاكىرت تاربيەلەدى. 1990 جىلى د.نۇرپەيىسوۆا اتىنداعى اتىراۋ وبلىستىق حالىق اسپاپتار وركەسترىنىڭ تىزگىنىن قولىنا الىپ, وسى ونەر ۇجىمىن بيىككە كوتەردى. وركەستردىڭ كوركەمدىك جەتەكشىسى-باس ديريجەرى بولا ءجۇرىپ, ۇلتتىق ونەردى ەلىمىزدە عانا ەمەس, شەتەلدە دارىپتەدى. ماسەلەن, 1994 جىلى وركەستر تۇركيادا وتكەن حالىقارالىق فەستيۆالدىڭ باس جۇلدەسىن يەلەنسە, 1998 جىلى «قۇرمانعازى جانە ۇلى دالا اۋەندەرى» فەستيۆالىندە توپ جاردى.
رىسباي عابديەۆ قۇرمانعازىنىڭ, دينانىڭ, داۋلەتكەرەيدىڭ, سەيتەكتىڭ, ەسبايدىڭ, قازانعاپتىڭ, ابىلدىڭ كۇيلەرىن تالماي ناسيحاتتادى. ەل اراسىندا كۇي قاعانى اتاندى. ومىردەن وتكەن سوڭ, ونىڭ ەسىمى اتىراۋداعى ونەر مەكتەبى مەن قالا كوشەسىنە بەرىلدى.
ەسكە الۋ كەشىندە نۇر-سۇلتان قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترى مەن وركەستردىڭ دومبىراشىلارى اتتارى اتالعان ۇلى كۇيشىلەردىڭ كۇيلەرىن توكپەلەتتى. ديريجەرلىك پۋلتكە ونەر ۇجىمىنىڭ كوركەمدىك جەتەكشىسى-باس ديريجەرى, قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆتىڭ ءوزى تۇردى. قازاق ۇلتتىق ونەر ۋنيۆەرسيتەتىنىڭ ۇستازدارى – قازاقستاننىڭ ەڭبەك سىڭىرگەن ءارتىسى تۇرار الىپباەۆ, ەدىل باسىعارا, جۇمابەك قادىرقۇلوۆ, باتىرلان ابەنوۆ, ايتولقىن توقتاعان كۇيلەردى شالقىتتى.
رىسباي عابديەۆتىڭ ۇرپاعىنا ونەر اكە قانىمەن دارىعان ەكەن. ۇلى مۇقاداس بايانمەن قۇرمانعازىنىڭ «اداي» كۇيىن قۇيقىلجىتتى. كەشتىڭ ءبىر جاڭالىعى وسى بولدى. ال كۇيشىنىڭ نەمەرەسى ارتۋر عابديەۆ انشىلىك ونەردى تاڭدادى. ول دا وسى كەشتە ونەر كورسەتتى.
