بۇگىنگى تاڭدا قازاق كۇرەسىنىڭ بەدەلى ءوسىپ, ءوز ەلىمىزدە عانا ەمەس, حالىقارالىق ارەناعا دا شىعا باستادى. سونىڭ ءبىر ايعاعى دەپ بيىل ءۇشىنشى جىل قاتارىنان وتكەن «قازاقستان بارىسى» جارىسىنىڭ وتكەنىن ايتۋعا بولادى. ال وسى قازاق كۇرەسى ەلوردامىز استانادا قانداي دەڭگەيدە دامىپ وتىر؟ ءبىز وسى ورايدا قازاقستاننىڭ ەڭبەك سىڭىرگەن جاتتىقتىرۋشىسى, حالىقارالىق دارەجەدەگى تورەشى (فيلا), «استانا باتىرى» جەكپە-جەك سپورت كلۋبىنىڭ باپكەرى عالىم قۇلەكەشەۆ مىرزانى اڭگىمەگە تارتقان ەدىك.
– قازىرگى كەزەڭدە استانا قالاسىندا قازاق كۇرەسىمەن اينالىساتىندار قاتارى شامامەن قانشالىقتى بولىپ وتىر, جالپى وسى ۇلتتىق سپورتىمىزعا دەگەن قىزىعۋشىلىق بار ما؟
– ارينە, جىل وتكەن سايىن قىزىعۋشىلىق ارتىپ كەلەدى. جالپى, استانا قالاسىنىڭ تۋريزم, دەنە تاربيەسى جانە سپورت باسقارماسىنا قاراستى «استانا باتىرى» جەكپە-جەك سپورت كلۋبىندا بوكس, كۇرەستىڭ بارلىق تۇرلەرى, تاەكۆوندو سەكىلدى سپورت تۇرلەرىن دامىتۋ بويىنشا جۇيەلى جۇمىستار اتقارىلادى. وسى كلۋبتىڭ تاربيەلەنۋشىلەرى رەسپۋبليكالىق جانە حالىقارالىق جارىستاردا تەك قانا ەلوردامىزدىڭ ەمەس, رەسپۋبليكامىزدىڭ دا نامىسىن ابىرويمەن قورعاپ جۇرگەندەرىن ماقتانىشپەن ايتا الامىن.
ال ءوزىمىزدىڭ ۇلتتىق سپورتىمىز – قازاق كۇرەسى جايىندا ايتار بولسام, بۇگىندە قالا بويىنشا ءۇش جۇزگە جۋىق ادام تۇراقتى تۇردە, كاسىبي دەڭگەيدە قازاق كۇرەسىمەن اينالىسادى. بۇلاردىڭ ىشىندە جاسوسپىرىمدەر, جاستار جانە ەرەسەكتەر دە بار. باپكەرلەر قاتارىندا قازاقستاننىڭ ەڭبەك سىڭىرگەن جاتتىقتىرۋشىسى, ەكى جوعارى ساناتتى باپكەر جانە بىرنەشە جاس ماماندار ەڭبەك ەتۋدە. شىنىن ايتۋ كەرەك, سوڭعى جىلدارى قازاق كۇرەسىنە كەلۋشىلەر قاتارى كوبەيىپ كەلە جاتىر. اسىرەسە, كۇرەسكە ۇيىرسەك بالالار كوبەيىپ كەلەدى. بۇل جەردە, ارينە, «قازاقستان بارىسى» جارىسىنىڭ وڭ ىقپالى بولعانىن ايتۋعا ءتيىسپىز.
– ەلوردامىزدا قازاق كۇرەسىنەن ءداستۇرى قالىپتاسقان جارىستار بار ما؟
-جىل سايىن جاسوسپىرىمدەر, جاستار جانە ەرەسەكتەر اراسىنداعى استانا قالاسىنىڭ چەمپيوناتى ءوتىپ تۇرادى. سونىمەن قاتار, «بايتەرەك» جۇلدەسى» دەگەن جارىسىمىز دا بار. بۇل ەلوردامىزدىڭ سيمۆولى بولىپ تۇرعان «بايتەرەك» مونۋمەنتى جانىندا, اشىق اسپان استىندا وتەتىن جارىس. ەلىمىزدىڭ ايماقتارىنان دا بالۋاندار كەلىپ قاتىسادى. وسى جارىستى الداعى ۋاقىتتا حالىقارالىق دەڭگەيگە كوتەرسەك دەگەن ويىمىز بار. ءار جىلدىڭ سوڭىندا «تاۋەلسىزدىككە تارتۋ» اتتى اشىق تۋرنير وتكىزەمىز. بۇل جارىسقا دا قاتىسۋشىلار جىل سايىن كوبەيىپ كەلەدى.ەلىمىزدەگى ەڭ بەدەلدى جارىسقا اينالىپ وتىرعان «قازاقستان بارىسى» ءتۋرنيرىنىڭ ۇيىمداستىرۋ شارالارىنا قاتىسامىز. مەملەكەتتىك جانە ۇلتتىق مەرەكەلەردە قازاق كۇرەسىنەن جارىس وتكىزۋ داستۇرگە اينالعان. وسىنىڭ ءبارى استانامىزدا قازاق كۇرەسىنىڭ دامۋىنا ىقپال ەتۋدە.
– قازاق كۇرەسىنەن بيىك جەتىستىكتەرگە جەتكەن بالۋاندار جايلى ايتىپ وتسەڭىز.
– بۇگىنگى تاڭدا استانا قالاسىنىڭ نامىسىن قورعاپ جۇرگەن بالۋانداردىڭ قاتارىندا قازاقستاننىڭ ەڭبەك سىڭىرگەن سپورت شەبەرى بار. ول – ەكى دۇركىن الەم چەمپيونى, ازيا جانە قازاقستان بىرىنشىلىگىنىڭ بىرنەشە مارتە جەڭىمپازى عاني سەيدىلداەۆ. حالىقارالىق دارەجەدەگى سپورت شەبەرى ەرلان ەستەك, بۇل جىگىت تە الەم چەمپيونى بولعان. بيىلعى ەل چەمپيوناتىندا جەڭىمپاز اتانىپ, بۇگىندە گەرمانيادا وتەتىن الەم بىرىنشىلىگىنە دايىندالىپ ءجۇر. سونىمەن قاتار, قازاقستاننىڭ سپورت شەبەرى اتاعىن 16 بالۋانىمىز يەلەنىپ وتىر. بۇل سپورتشىلاردىڭ ءبارى دە استانامىزدىڭ نامىسىن حالىقارالىق جارىستاردا قورعايتىن ساڭلاقتار دەسەم بولادى.
عالىم قوجابەكوۆ
