استاناداعى ۇلتتىق اكادەميالىق كىتاپحانادا قازاقستاننىڭ ەڭبەك ەرى, زاڭعار جازۋشى ءابىش كەكىلباەۆتى ەسكە الۋعا ارنالعان ادەبي كەش ءوتتى. ىزگىلىكتى شارا اياسىندا قالامگەر جۇمابەك مۇقانوۆتىڭ تالانتتى تۇلعانىڭ ومىرىنە ارناپ جازىلعان «ءجۇز كۇندىك جالعىزدىق» اتتى ەستەلىك كىتابىنىڭ تۇساۋى كەسىلدى.
وتكەن جىلدىڭ جەلتوقسان ايىندا دۇنيەدەن وزعان اسىل ازامات تۋرالى العاش ءوتىپ وتىرعان كەشتىڭ ءتىزگىنىن جازۋشىنىڭ ومىردەگى جاقىن سىيلاسقان دوسى, بەلگىلى عالىم مىرزاتاي جولداسبەكوۆ ۇستادى. ول دارابوز تۇلعانىڭ ءومىرى مەن ونەرى, قايراتكەرلىك قىرى جايىندا ارعى-بەرگى تاريحتى تەرەڭنەن تولعاپ, ساباقتى ءسوز ساباقتادى. ەجەلدەن حالقىمىز ماڭعىستاۋدى 362 اۋليە جاتقان جەر دەپ قادىر تۇتادى. وسىنداي ارۋاق قونعان وڭىردە دۇنيەگە كەلگەن ءابىش كەكىلباەۆتا قاسيەت قونعان ادام. ونى مىرزاتاي اعا ءابىش تۋرالى جازعان ماقالاسىندا «363-ءشى اۋليە» دەپ ايتقانى بار. ودان كەيىن بەلگىلى قالامگەرلەر تولەن ابدىك, قاجىعالي مۇحامبەتقاليۇلى ءوز ەستەلىكتەرىمەن ءبولىستى. ال سەرىك تۇرعىنبەكۇلى, باقىتجان توباياقوۆ سىندى اقىندار ارناۋ ولەڭدەرىن وقىدى.
«ءجۇز كۇندىك جالعىزدىق» دەپ اتالاتىن جاڭا جيناق الىپ ادامنىڭ ءومىرى مەن شىعارماشىلىق جولىن جان-جاقتى بەينەلەگەن. اتالعان تۋىندىنىڭ تۇساۋىن كومپوزيتور ءىليا جاقانوۆ پەن رەسپۋبليكالىق ارداگەرلەر كەڭەسىنىڭ توراعاسى ومىرزاق وزعانباەۆ كەستى. ەستەلىك اۆتورى جۇمابەك مۇقانوۆ تا ءوزى جازعان كىتاپ تۋرالى تەرەڭىرەك وي قورىتتى. جازۋشىنىڭ جارى كلارا انامىز دا ءابىش اعا تۋرالى جۇرەك تەربەيتىن ءسوز سويلەدى.
سونداي-اق, جينالعان قاۋىمعا اسا كورنەكتى قالامگەردىڭ ءومىرى مەن شىعارماشىلىعىنا ارنالعان دەرەكتى فيلم مەن كىتاپ كورمەسى كورسەتىلدى.
قىسقاسى, وقىرماندار ۇرپاققا تاعىلىم بولار تاماشا كەشتىڭ كۋاسى بولىپ, ءابىش الەمىنە ساياحات جاسادى.
ازامات ەسەنجول
