استانا قالاسىنىڭ جاستار ساياساتىن قولداۋ مەملەكەتتىك قورى «اۋلا كلۋبتارىنىڭ كورمە بايقاۋى» اتتى كوڭىلدى جارىس ۇيىمداستىردى. وعان 9 اۋلا كلۋبىنىڭ 1000-عا جۋىق تاربيەلەنۋشىسى قاتىستى.
ءاربىر اۋلا كلۋبى اتىنان 20 بالادان قۇرىلعان توپتار الدىن الا بەكىتىلگەن ەرەجەگە سايكەس, «كۇش اتاسىن تانىماس», «تاپقىر بولساڭ, تاۋىپ كور», «بالالىق شاققا ساياحات», «ءان – كوڭىلدىڭ اجارى», «ەرتەگىلەر الەمى», «ويلان, تاپ!», تاعى باسقا سايىستاردا ءوزارا بايگەگە ءتۇستى. وندا بالالار كەزەڭ-كەزەڭ بويىنشا وزدەرىنىڭ اكتەرلىك شەبەرلىكتەرىن كورسەتىپ, ءان ايتىپ, بي بيلەپ, سۋرەت سالىپ, شىعارماشىلىقتارىن شىڭدادى. ءوز وتانى مەن قالاسى تۋرالى ۆيكتورينالىق سۇراقتارعا جاۋاپ بەردى. استانا قالاسى جاستار ساياساتىن قولداۋ مەملەكەتتىك قورىنىڭ ديرەكتورى باقىتجان جۇنىسبەكوۆتىڭ ايتۋىنشا, اۋلا كلۋبتارى وقۋشىلار اراسىندا كەڭىنەن تانىمال. تاربيەلەنۋشىلەر سانى كۇن سايىن ارتىپ كەلەدى.
ءىس-شارانىڭ سوڭى مەرەكەلىك كونتسەرتكە ۇلاستى. وندا اۋلا كلۋبتارىنىڭ تاربيەلەنۋشىلەرى ءوز ونەرلەرىن ورتاعا سالدى. سايقىمازاقتار وقۋشىلارعا كوڭىلدى باعدارلاما ۇيىمداستىرىپ, ءتۇرلى ويىندار ويناتىلدى. سوڭىندا بالالارعا ءتاتتى سىيلىقتار ۇيلەستىرىلدى.
