وتان قورعاۋشىلار كۇنى مەن جەڭىس مەرەكەسىنە وراي ەلوردادا اۋقىمدى شارالار وتەدى. بۇل تۋرالى كەشە استانا قالاسى ىشكى ساياسات باسقارماسىنىڭ ۇيىمداستىرۋىمەن وتكەن ءباسپاسوز ءماسليحاتىندا ايتىلدى.
جيىندى اشقان قالالىق ىشكى ساياسات باسقارماسىنىڭ باسشىسى باقىت ەسىموۆا وتان قورعاۋشىلار مەرەكەسى مەن جەڭىستىڭ 70 جىلدىعىنا وراي ەلىمىزدە وتكىزىلەتىن شارالاردىڭ باستىسى استانادا ۇيىمداستىرىلاتىنىن, سونىڭ ىشىندە مەملەكەتتىك ماڭىزدى وقيعالار قۇرمەتىنە ساپ تۇزەيتىن اسكەري شەرۋدى ەرەكشە اتاپ وتەتىنىن جەتكىزدى. الايدا, «قازاق ەلى» مونۋمەنتى الدىندا باستالاتىن اسكەري پارادقا جۇرتشىلىق ارنايى شاقىرۋ بيلەتىمەن عانا كىرە الادى. ويتكەنى, ونداعى ورىندار شەكتەۋلى. ەسەسىنە, اسكەري شەرۋدى تىكەلەي ەفير ارقىلى ۇيدەن تاماشالاۋعا بولادى. ەلىمىزدىڭ باستى تەلەارنالارى وسىعان جۇمىلىپ وتىر» دەيدى باقىت ەسىموۆا.
ىشكى ساياسات باسقارماسىنىڭ باسشىسى 7 مامىر كۇنى تۇستە ەلباسىنىڭ قاتىسۋىمەن گەنەرال-مايور يۆان پانفيلوۆتىڭ ەسكەرتكىشىن اشۋ جوسپارلانىپ وتىرعانىن دا ايتا كەتتى.
بۇدان كەيىن مادەنيەت باسقارماسى باسشىسىنىڭ ورىنباسارى ناريما مۇحامبەتالينا ءسوز الىپ, مەرەكە كۇندەرى استانادا 50-دەن استام شارا وتكىزىلەتىنىن حابارلادى. نەگىزگى مەرەكەلەر «قازاق ەلى» مەن «بايتەرەك»مونۋمەنتتەرى الاڭىندا, «قازاقستان» سپورت كەشەنى جانىنداعى ستۋدەنتتەر ساياباعىندا, قالالىق اكىمدىك الاڭى مەن جاستار سارايىنىڭ الدىندا ۇيىمداستىرىلادى. بارلىق الاڭدا كونتسەرتتىك باعدارلامالار ءوتىپ, ەلوردالىق شىعارماشىلىق ۇجىمدارمەن قاتار, روزا رىمباەۆا, الىبەك دىنىشەۆ, سەرگەي زاحاروۆ, رينات يبراگيموۆ سىندى انشىلەر ونەر كورسەتەدى.
8 مامىر «وتان قورعاۋشىلار» الاڭى مەن قالانىڭ ورتالىق زيراتىنا گۇلشوقتارىن قويۋمەن باستالماق. بۇعان قوسا, 9 مامىر كۇنى وتەتىن ءانشى ايگۇل يمانباەۆانىڭ «كۇتكەن كۇن» كەشى مەن وپەرا ءانشىسى ماريا مۋدرياكتىڭ وپەرالىق كونتسەرتىن اتاپ وتۋگە بولادى.
ءباسپاسوز ءماسليحاتىنا قاتىسقان قالالىق جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى مەيىرلان نارىنبەتوۆ اسكەري مەرەكەلەردىڭ باستى كەيىپكەرلەرى – سوعىس ارداگەرلەرىنە كورسەتىلىپ جاتقان الەۋمەتتىك كومەكتەر جونىندە اڭگىمەلەدى. بۇگىندە استانا قالاسىندا 206 سوعىس اراگەرى بولسا, سونىڭ 49-ى – مايداننان مۇگەدەك بولىپ ورالعاندار. وتان ءۇشىن وت كەشكەن قاريالاردىڭ ءبارى باسپانامەن قامتاماسىز ەتىلگەن. ەلورداعا سوڭىنان قونىس اۋدارعان 6 ارداگەرگە جاقىندا پاتەر كىلتى تاپسىرىلعان. ەندى ارنايى كوميسسيا قۇرىلىپ, ارداگەرلەردىڭ ۇيىنە جوندەۋ جۇمىستارىن جۇرگىزۋ قولعا الىنىپتى. مەيىرلان ءادىلعازىۇلىنىڭ ايتۋىنشا, بۇل شارۋالار جىل اياعىنا دەيىن اياقتالادى.
– رەسپۋبليكالىق جانە جەرگىلىكتى بيۋدجەت ەسەبىنەن مەرەكە قۇرمەتىنە وراي ارداگەرلەرگە بولىنگەن قاراجات تۇگەلىمەن ولاردىڭ قولىنا ءتيدى. ارداگەرلەردىڭ اسكەري شەرۋگە كيىپ شىعاتىن بىرىڭعاي كيىمى دە ءازىر. وزدەرىڭىزگە بەلگىلى, ماسكەۋدە وتەتىن پارادقا قازاقستاننان 6 سوعىس ارداگەرى بارادى, سونىڭ بىرەۋى – احات بەكمادي استانادان. ارداگەرمەن بىرگە قالاداعى ورتالىق كلينيكالىق گوسپيتالدىڭ باس دارىگەرى ءادىلحان ابدۋلين ەرىپ بارادى, – دەيدى مەيىرلان نارىنبەتوۆ.
جەڭىستىڭ 70 جىلدىعىنا وراي ەلوردادان 4812 ادام مەرەيتويلىق مەدالگە ۇسىنىلىپ وتىر ەكەن.
قىمبات توقتامۇرات
