«مايدان اندەرى»
جاقىندا ۇلى جەڭىستىڭ 70 جىلدىعىنا وراي ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا استانا قالاسى تىلدەردى دامىتۋ باسقارماسىنىڭ قولداۋىمەن «مايدان اندەرى» اتتى مونوسپەكتاكلدىڭ پرەمەراسى بولدى.
شىعارما اۆتورى – جازۋشى روللان سەيسەنباەۆ. مونوسپەكتاكلدەگى كەيىپكەرلەردى باستان-اياق سومداپ شىعاتىن قازاقستاننىڭ حالىق ءارتيسى – تىلەكتەس مەيراموۆ. قويۋشى رەجيسسەر – ۇلپان سەرىكبولقىزى.
سپەكتاكلدەگى باس كەيىپكەر سادىر بايبارىسوۆ – سۇراپىل سوعىستان امان كەلگەن سولدات. سوعىستان ورالعان سوڭ ءبىر مەكەمەنىڭ رەۆيزورى بولىپ, وتىز جىلداي قىزمەت اتقارادى. توي-تومالاقتا, باسقوسۋلاردا اراق ءىشۋدى ونشا تەرىس كورمەيدى. ءىشىپ السا, ۇرىس دالاسىندا سالعان اندەرىن ايتادى. تۇسىندە دە كورەتىنى – سوعىس, وق بوراعان سۇراپىل كۇندەر. وققا ۇشقان دوسى, جارالى ورىس قىزىن ءبىر ءتۇن ارقالاپ جۇرگەنى ءومىرى ەسىنەن كەتپەيدى. سوسىن ىشەدى, ءان سالادى… ءبىر ساعات بويى وسىنداي اۋىر تاعدىر يەسىنىڭ وبرازىنا كىرىپ, كورەرمەندى كۇلدىرەتىن جەردە كۇلدىرىپ, جىلاتاتىن جەردە جىلاتقان حالىق ءارتيسى تىلەكتەس مەيراموۆ: «قازىر, وكىنىشكە قاراي, ارداگەرلەرىمىزدى جەڭىس كۇنى عانا ەسكە الامىز. قالعان كۇندەرى نازاردان تىس قالىپ جاتادى. مەنىڭ اكەم دە سوعىسقا قاتىسقان, سول سوعىستىڭ زاردابىنان 63 جاسىندا قايتىس بولدى. مەن سول سوعىسقا قاتىسقان ارداگەرلەر, اكەم مەن ءوزىمنىڭ بالالارىمنىڭ, نەمەرەلەرىمنىڭ اراسىنداعى دانەكەر سياقتىمىن. اكەم كورگەن ازاپتى بالالارىما, نەمەرەلەرىمە تۇسىندىرە السام, پارىزىم ورىندالدى دەپ ەسەپتەيمىن» دەپ ۇلى وتان سوعىسىنىڭ ارداگەرلەرىنە دەگەن قۇرمەتىن ءبىلدىردى.
ىرىسبەك دابەي