قازاننىڭ العاشقى جەكسەنبىسى – ۇستازدار كۇنى. بىلگەن, تۇيگەنىن بالاعا ۇيرەتۋدەن جالىقپايتىن مۇعالىم قاشاندا قاستەرلى. قازىر قالادا سالتاناتتى شارالار ۇيىمداستىرىلىپ, مۇعالىمدەرگە قۇرمەت كورسەتىلىپ جاتىر. قۇرمەتتى ماماندىق يەسىنىڭ مارتەبەسىن ارتتىرۋدى ماقسات تۇتقان «نۇر وتان» حدپ استانا قالالىق فيليالى دا بۇل شارادان قالىس قالمادى.
مەرەيلى شارا بارىسىندا «نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى قايرات جاڭابەرگەنوۆ بالاباقشالاردىڭ, ورتا جانە كاسىپتىك مەكتەپتەردىڭ, كوللەدجدەردىڭ بىرقاتار مۇعالىمدەرىن مەرەكەلەرىمەن قۇتتىقتادى. سونىمەن بىرگە, «نۇر وتان» حدپ استانا قالالىق فيليالى توراعاسى, قالا اكىمى يمانعالي تاسماعامبەتوۆتىڭ اتىنان, پارتيا اتىنان بىرقاتار مۇعالىمدەرگە گراموتالار مەن العىس حاتتار جانە اقشالاي سىيلىقتار تابىس ەتتى. «كوپ ماماندىقتاردىڭ ىشىندە جان-جاقتى بىلىمدىلىكتى, يكەمدىلىكتى, شەبەرلىكتى, ەرەكشە شاكىرتجاندىلىقتى, مەيىرىمدىلىكتى قاجەت ەتەتىن ماماندىق – ۇستازدىق. سىزدەردىڭ ەڭبەكتەرىڭىز ەلىمىزدىڭ جارقىن بولاشاعىن قالىپتاستىرادى. وسىنداي قاسيەتتى ەڭبەكتەرىڭىزدى ءارى قاراي تابىستى جالعاستىرا بەرۋلەرىڭىزگە تىلەكتەسپىن», – دەدى قايرات جاڭابەرگەنوۆ. شارا سوڭى مەرەكەلىك كونتسەرتكە ۇلاستى.
ەركەجان ساتىمبەك
