مەرەكەلىك مەرەي
تاۋەلسىزدىك كۇنى مەرەكەسى قارساڭىندا ەلوردا اكىمدىگىندە مەرەيلى شارا ءوتتى. استانا قالاسى اكىمىنىڭ ورىنباسارى ەرمەك امانشاەۆ استانانىڭ 20 جىلدىعىنا ارنالعان مادەني-رۋحاني ءىس-شارالارعا بەلسەنە قاتىسقان ءبىر توپ ادامدى ماراپاتتادى.
استانا اكىمى باقىت سۇلتانوۆتىڭ العىس حاتىن جانە كادەسىيلار العانداردىڭ اراسىندا ءانشى جۇلدىز ءۋاليحان, تانىمال ەسترادا انشىلەرى باۋىرجان يساەۆ, اسقار جايلاۋباەۆ پەن «استانا» راديوسىنىڭ جۇرگىزۋشىسى سىمبات تالعاتقىزى, «تاڭشولپان» باعدارلاماسىنىڭ جۇرگىزۋشىسى نازەركە نۇرتاس, «ورلەۋ» جانە «Z» توبىنىڭ انشىلەرى بار.
«بيىل 20 جىلدىقتىڭ اياسىندا ەلىمىزدىڭ بارلىق وڭىرلەرىندە بولدىق. سونداعى ەڭ باستى بايقاعانىمىز, اجارلى استانامىزبەن بۇكىل قازاقستاندىقتار ماقتانادى. باس قالادا بولىپ جاتقان جاڭالىقتاردى, ءىرى جوبالاردى وڭىرلەرگە تانىستىردىق. جۇرتتىڭ كوبى ەلوردادا قالىپتاسقان جوعارى ساپالى ءومىر سالتىنا, رۋحاني جەتىستىكتەرگە تاڭ قالعانىن جاسىرمادى.
سىزدەر ەلوردامىزدىڭ 20 جىلدىعىنا ارنالعان ءىس-شارالارعا بەلسەنە اتسالىستىڭىزدار. مادەني-رۋحاني سالانىڭ دامۋىنا ۇلەس قوستىڭىزدار. وسىعان وراي, استانا قالاسىنىڭ اكىمى باقىت سۇلتانوۆتىڭ اتىنان بارشاڭىزعا ءۇلكەن العىس ايتامىن» دەدى ەرمەك امانشاەۆ سالتاناتتى راسىمدە.