ەلوردا ءماسليحاتىندا تۇراقتى كوميسسيا مۇشەلەرىنىڭ قاتىسۋىمەن قوعامدىق تىڭداۋ ءوتتى. وندا استاناداعى كوشى-قون ماسەلەسى تالقىلاندى.
الدىمەن استانا قالاسى ىشكى ىستەر دەپارتامەنتى باستىعىنىڭ ورىنباسارى باتىرلان ەسەنباي بايانداما جاسادى. ەلورداداعى قىلمىستىق ءىستەردىڭ كوبەيۋى باس قالاعا كەلۋشىلەر قاتارىنىڭ كۇن ساناپ ارتۋىمەن بايلانىستى بولىپ وتىرعانىن العا تارتقان ول سوڭعى بەس جىلدا قالا حالقىنىڭ سانى ەداۋىر وسكەنىن, وعان ەلىمىزدىڭ بارلىق وڭىرلەرىنەن, الىس جانە جاقىن شەتەلدەردەن باس شاھارعا اعىلۋشىلار قاتارىنىڭ ارتۋى دا اسەر ەتىپ وتىرعانىن ايتتى.
– جىل باسىنان بەرى استاناعا ءارتۇرلى ماقساتتارمەن 90 مىڭنان استام ادام كەلسە, ولاردىڭ 20 مىڭعا جۋىعى الىس شەتەلدەردىڭ ازاماتتارى. بۇل رەتتە باس قالادا شەتەلدىكتەردىڭ كەلۋى, ولاردىڭ زاڭناما تالاپتارىن ساقتاۋى باقىلاۋعا الىنعانىنا قاراماستان, سىرتتان كەلگەندەردىڭ كوبى ەلىمىزدىڭ زاڭنامالارىن ورىندامايدى, سونىڭ سالدارىنان قالاداعى زاڭبۇزۋشىلىقتاردىڭ جارتىسىنا جۋىعى ميگرانتتاردىڭ قاتىسۋىمەن بولىپ وتىر, – دەدى ب.ەسەنباي.
زاڭسىز كوشى-قونعا قارسى ارەكەت ەتۋ بويىنشا رەسپۋبليكالىق ارنايى ءىس-شارا وتكىزىلىپ, اتالمىش شارا اياسىندا جانە شەتەل ازاماتتارىنىڭ كوشى-قون زاڭناماسىن ساقتاۋىن باقىلاۋدى قامتاماسىز ەتۋ ماقساتىندا «نەلەگال-2014» جەدەل الدىن الۋ ءىس-شاراسى ۇيىمداستىرىلعان. ورىنباساردىڭ ايتۋىنشا, وسى شارا بارىسىندا 1599 اكىمشىلىك قۇقىق بۇزۋشىلىق تىركەلگەن. ناتيجەسىندە, 1492 شەتەل ازاماتى اكىمشىلىك جاۋاپكەرشىلىككە تارتىلىپ, اكىمشىلىك سوت شەشىمىمەن 92 ازامات مەملەكەتتەن الاستاتىلعان.
ودان ءارى ءسوز العان استانا قالاسىنىڭ ىشكى ىستەر دەپارتامەنتى كوشى-قون پوليتسياسى باسقارماسىنىڭ باستىعى گۇلۆيرا دونەنباەۆا ىشكى كوشى-قون ۇدەرىستەرىن رەتتەۋ سالاسىنداعى ماسەلەلەردىڭ ءبىرى – ازاماتتاردىڭ تۇرعىلىقتى جەرى بويىنشا تىركەۋسىز تۇرۋى جانە ۋاقىتشا تۇراتىن ورنى بويىنشا ەسەپكە الىنباۋىنا توقتالدى. ىشكى كوشى-قوندى رەتتەۋدىڭ شەكتەۋ نورمالارىنىڭ بولماۋى ءۇي يەلەرىنە ءوزدەرىنىڭ تۇرعىنجايلارىنا ءجۇزدەگەن ازاماتتى جانە شەتەلدىكتى ءتىركەۋگە مۇمكىندىك بەرىپ وتىرعانىن ايتا كەلە, ول وسى ماسەلەنى حالىق قالاۋلىلارىنىڭ تالقىسىنا سالدى. دەپۋتاتتار بولسا بۇل ماسەلەنى قالالىق ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس ماسەلەلەرى جونىندەگى تۇراقتى كوميسسياسىنىڭ وتىرىسىندا ەگجەي-تەگجەيلى قاراۋ جونىندەگى ارىپتەستەرى ب.يساباەۆتىڭ ۇسىنىسىن ماقۇلدادى.
كۇن تارتىبىندەگى ماسەلەنى تالقىلاۋ بارىسىندا قالالىق ءماسليحاتتىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ توراعاسى ميراس شەكەنوۆ, قالالىق ءماسليحاتتىڭ زاڭدىلىق, قۇقىق ءتارتىبى جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسياسى توراعاسىنىڭ ورىنباسارى تيمۋر ورازاقوۆ, قالالىق ءماسليحاتتىڭ دەپۋتاتى زاۋرە ءجۇسىپوۆا جانە قالالىق كاسىپوداقتار كەڭەسىنىڭ توراعاسى سارسەنباي مىڭباەۆ پىكىر ءبىلدىردى. ولار زاڭسىز كوشى-قونعا توسقاۋىل قويۋ قاجەتتىگىن اتاپ كورسەتتى.
«ميگرانتتار ماسەلەسى تەك ءبىزدىڭ ەلىمىزدە عانا قالىپتاسىپ وتىرعان ماسەلە ەمەس, الەمدە جاھاندانۋ ۇدەرىسى ءجۇرىپ جاتقاندىقتان, كوشى-قون پروبلەماسىن الەمدىك دەڭگەيدەگى ماسەلە دەۋگە بولادى. سوندىقتان, بۇل ماسەلەمەن تەرەڭىرەك اينالىسقان ءجون. بۇگىنگى باسقوسۋىمىزدىڭ ماقساتى دا – وسى» دەدى س.ەسىلوۆ.
