استانالىق بالعىندار ءۇشىن قىستىڭ قىزىعى ەندى باستالدى.
ەلوردادا بالالارعا ارنالعان سىرعاناقتار, اشىق اسپان استىنداعى مۇز ايدىندارى جانە جىلداعى ءداستۇر بويىنشا مۇز قالاشىعى بوي كوتەردى.
مۇسىنشىلەر قىستىڭ سۋىعىنا قاراماستان, مۇزدان «التاي مادەنيەتى», «ارعىماق», «ەجەلگى تۇرىك جاۋىنگەرى», «ساياتشى», «قۇسبەگى» سىندى ءتۇرلى مۇسىندەر ورناتتى.
بالالارعا ارنالعان ەرتەگى كەيىپكەرلەرى دە قالانىڭ ءار جەرىنەن ءوز ورنىن تاپتى. مۇزدان ءمۇسىن جاسايتىن شەبەر عاجايىپ سىزدىقوۆانىڭ ايتۋىنشا, بۇل وڭاي شارۋا ەمەس. «مۇزدىڭ استى-ءۇستىن تەگىستەپ, قىرىن شىعارىپ العاننان كەيىن سۋ قۇيىپ, ونى ءبىر-بىرىنە جابىستىرامىز. ارتىق جەرىن بالتامەن شاۋىپ, جان-جاعىن تەگىستەيمىز. ءمۇسىن جاساۋعا ارنالعان مۇزدىڭ ءبىر بولشەگى 25-30 كەلى تارتادى. ال, ءبىر ءمۇسىن قالاۋعا كەم دەگەندە 3-4 كۇن ۋاقىت كەتەدى» دەيدى ول.
ايتا كەتكەن ءجون, سىرعاناق الاڭدارى بالالاردىڭ قاۋىپسىزدىگى ءۇشىن جارتىلاي قورشالعان. ال, ورناتىلعان مۇسىندەر بەزەندىرىلىپ, تۇنگى قالانىڭ كەلبەتىنە ءسان بەرۋ ءۇشىن تۇگەل جارىقتاندىرىلعان.
گۇلميرا ايماعانبەت
