«كاۋسار» مادەني-تانىمدىق بىرلەستىگى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاستارىنىڭ سۇيىكتىسىنە اينالعالى قاشان. تاۋ تۇلعالى زيالىلارمەن كەزدەسىپ, ەركىن پىكىر الماسۋعا, بايلانىس ورناتۋعا زور مۇمكىندىك بەرىپ وتىرعان ۇيىم بىزگە ەرەكشە ىستىق.
قر ەڭبەك سىڭىرگەن قايراتكەرى, قازاقستاننىڭ قۇرمەتتى ءجۋرناليسى, «قۇرمەت» وردەنىنىڭ يەگەرى نۇرتورە ءجۇسىپ ءبىلىم وردامىزدىڭ كەزەكتى قوناعى بولدى. ءباسپاسوزدىڭ تىنىمسىز ساربازىنىڭ ەڭبەك جولى, ۇلتتىق پۋبليتسيستيكاداعى وزىندىك ءتىلىنىڭ وتكىرلىگى – قالام ۇستاعان جاستارعا كەرەمەت ۇلگى. نۇرتورە اعانىڭ ەسىمى ءوزى باسشىلىق ەتكەن «جاس الاش» جانە بۇگىنگى «ايقىننان» اجىراماس ۇعىمداي بولىپ كەتتى.
كەزدەسۋ, ادەتتەگىدەي, باس كەيىپكەردىڭ ءتول تۋىندىلارىنان باستالدى. وراق ءتىلدى نۇرتورە اعانىڭ «ءبىز بارىنە سەنەمىز!», «بەت-بەينەسىز ۇلت بولا ما؟», «ءبىر مينۋتىمىزدى نەگە قيمايمىز؟», «بۇل شاعالا – قاي شاعالا؟», «جەلىگە بايلانعان جۇلىن», «قايران, ىبىراي-اي!» سەكىلدى بىرقاتار كوسەمسوزدەرى وقىلدى. «ماقالانى ءبىر وقىپ شىعۋعا ۇيرەنگەنبىز عوي. تىڭداعان مۇلدە بولەك ەكەن. مۇنى مەن جازعانمىن با؟» دەپ ازىلمەن جالعادى كەشتىڭ قوناعى.
نۇرتورە بايتىلەسۇلى دامىعان ەلدەردىڭ قاتارىنا قوسىلۋ جوسپارى, جاڭا تەحنولوگيالاردىڭ زيانى مەن ارتىقشىلىقتارى جايىندا تۇشىمدى ويلار ايتتى. «بايلىقتان ءوز ەركىمىزبەن باس تارتىپ, ميعۇلالىققا قاراي ۇمتىلىپ بارا جاتىرمىز. ۇلت رەتىندە الاڭدايتىن ۋاقىت جەتتى» دەپ ازاماتتىق پىكىرىن ورتاعا سالدى.
«ايقىننىڭ» كەيىنگى ءبىر سانىندا «قۇندىلىقتاردىڭ ءتورت تاعانىن ايقىنداپ بەرگەن ابايعا, سۇرلەۋى مەن كۇرمەۋى كوپ زاماندا الداعى باعىت-باعداردى بەلگىلەپ بەرگەن ەلباسىعا نەگە قۇلاق اسپايمىز؟» دەپ ءۇن قاتىپ ەدى. وسى كەزدەسۋدە دە اعامىز ءبىراز تولعاندىرار ويلارىمەن ءبولىستى.
نۇرتورە بايتىلەسۇلى ءوزىنىڭ ەڭبەك جولىندا ءاردايىم ەل مۇددەسىن ءبىرىنشى ورىنعا قويىپ كەلەدى. مەملەكەت ساياساتىن قولداپ, حالىققا ءتۇسىندىرۋ ميسسياسىن ابىرويلى اتقارۋدا. وسى كەزدەسۋدە ول «رۋحاني جاڭعىرۋدا مەجە, مەزگىل دەگەن جوق. رۋحاني جاڭعىرۋ – كۇن سايىن جۇرەدى. رۋحاني جاڭعىرۋ قازاق باردا جۇرە بەرەدى. ول كونتسەرت بەرىپ, كەش جاساپ, جاڭعىرىپ كەتتىك دەپ قويا سالاتىن نارسە ەمەس. رۋحاني جاڭعىرۋ – قازاق بالاسىنىڭ نامىسىن بەرمەۋى» دەپ باسا ايتتى.
كەش بارىسىندا نۇرتورە اعامىزدىڭ ەلەۋلى ەڭبەگى مەن ايرىقشا تالانتىنا جوعارى باعا بەرىپ, ويىن بىلدىرگەن, قازاق تەلەۆيزياسىنىڭ نەگىزىن قالاۋشىلاردىڭ ءبىرى, تەلەدراماتۋرگ, پۋبليتسيست-جازۋشى سۇلتان ورازالى: «مەنىڭ «ايقىندى» جازدىرىپ العىزۋىمنىڭ ءبىر-اق سەبەبى بار. ول – مىنا جىگىتتىڭ كوسەمسوزدەرى. اپتاسىنا ءتورت رەت شىعاتىن گازەتتىڭ ءۇش سانىنا نۇرتورە ماقالا جازادى. ءبىر جىلدا 365 كۇن بار دەسەك, بۇل ءىنىم جىلىنا 150 ماقالا جازادى دەگەن ءسوز عوي» دەپ پۋبليتسيستيكا شەبەرىنىڭ مەرەيىن ارتتىرىپ جىبەردى. ءتىپتى سۇلتان اعا كەش كەيىپكەرىنىڭ جازعان ماقالالارىن قىسقاشا تالداپ, تاقىرىپتىق ەرەكشەلىكتەرىن ايقىنداپ, وتە سالماقتى ءارى قۇندى ويلار ايتتى.
كەزدەسۋ بارىسىندا «كاۋسار» بىرلەستىگىنىڭ جەتەكشىسى, ونەرتانۋ پروفەسسورى ءارى كەشتىڭ تىزگىنشىسى كەنجەعالي مىرجىقباي ءوزىنىڭ ءان شاشۋىن دا ارنادى. كەزدەسۋ كۇنى نۇرتورە اعانىڭ ەگىز قىزدارىنىڭ تۋعان كۇنىمەن سايكەس كەلىپ قالعانى دا بار. وسىلايشا حالىق ءانى «دۋدار-ايمەن» كەنجەعالي اعامىز تاعىلىمى مول كەشتىڭ كوركىن اشا ءتۇستى.
كەش سوڭىندا ۋنيۆەرسيتەتىمىزدىڭ رەكتورى ەرلان ءباتتاشۇلى باستى قوناعىمىز – نۇرتورە جۇسىپكە ءداستۇرلى تۇردە «كۇلتەگىن» مەدالىن تاپسىردى.
ساعىنىش ەرتاي,
ل.گۋميلەۆ اتىنداعى ەۋرازيا ۇلتتىق
ۋنيۆەرسيتەتى «جۋرناليستيكا»
ماماندىعىنىڭ ماگيسترانتى
