كەشە قر ۇلتتىق مۇراعاتىندا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان قۇجاتتىق كورمە اشىلدى. وندا اتالمىش مەكەمە جانە قر ىشكى ىستەر مينيسترلىگىنىڭ اقپاراتتىق-اناليتيكالىق ورتالىعى, قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ قورلارىنان الىنعان «وتە قۇپيا» گريفى سوعىلعان قۇجاتتاردىڭ تۇپنۇسقالارى العاش رەت تانىستىرىلدى.
كورمەنىڭ اشىلۋىنا كەلگەندەر ءاليحان بوكەيحان, احمەت بايتۇرسىنۇلى, مىرجاقىپ دۋلاتوۆ, ماعجان جۇماباەۆ, سانجار اسپاندياروۆ, جۇسىپبەك ايماۋىتوۆ, ساكەن سەيفۋللين, ءىلياس جانسۇگىروۆ, بەيىمبەت مايلين, وراز جاندوسوۆ, تەمىربەك ءجۇرگەنوۆ, ابىلقايىر دوسوۆ, جۇمات شانين, شاحان مۋسين, ابۋباكىر الدياروۆ, جۇماعالي تىلەۋلين, تۇرلىحان مەن الداجار حاسەنوۆتەر, مۇحتيزار تيتاقوۆ سىندى قۋعىن-سۇرگىنگە ۇشىراعان ۇلت زيالىلارىنىڭ قۇجاتتارى مەن تەرگەۋ ماتەريالدارىمەن تانىسۋ مۇمكىندىگىن الدى.
سونداي-اق, قازاقستانعا جەر اۋدارىلعان ۇلتتاردىڭ, قۋعىنعا تۇسكەن ءاسكەري تۇتقىنداردىڭ, ءدىن قىزمەتكەرلەرىنىڭ تەرگەۋ قۇجاتتارىن دا كوردى. كورمەگە بەلگىلى مەملەكەت جانە قوعام قايراتكەرلەرى, ەتنومادەني بىرلەستىكتەر وكىلدەرى, قازاقستانداعى شەتەل ەلشىلىكتەرىنىڭ قىزمەتكەرلەرى, وتكەن عاسىرداعى ناۋبەت قۇرباندارى مەن ولاردىڭ تۋىستارى قاتىسىپ, سول قارالى كۇندەردى ەسكە الدى.
امانعالي شميتۇلى
