كەلەر جىلدىڭ شىلدە ايىنان باستاپ پاتەر يەلەرى كووپەراتيۆىنىڭ ءداۋىرى اياقتالىپ, تۇرعىن ءۇيدى باسقارۋ جاۋاپكەرشىلىگى مۇلىك يەلەرى بىرلەستىگى نەمەسە جاي سەرىكتەستىكتىڭ بىرىنە جۇكتەلەدى. تۇرعىن ءۇي-كوممۋنالدىق شارۋاشىلىق سالاسىنداعى رەفورمانىڭ باستى ماقساتى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالىپ وتىرعانى تۇسىنىكتى. ونىڭ ۇستىنە «كسك» ۇعىمى تۇرعىن ءۇيدى باسقارۋ سەكتورىنىڭ باستى تەرمينىنە اينالعان 20 جىلدان استام ۋاقىت ىشىندە بۇل ۇيىمعا العىس ايتۋعا نيەتتىلەردىڭ قاتارى كوپ بولا قويعان جوق.
سالادا اشىقتىقتىڭ بولماۋىنان حالىقتىڭ پاتەر يەلەرى كووپەراتيۆىنىڭ قىزمەتىنە تولەپ كەلگەن اقىسى قۇمعا سىڭگەن سۋدىڭ كەبىن كيدى. تۇرعىنداردىڭ ءاربىر تيىنى ءۇشىن ەسەپ بەرۋ داعدىسى قالىپتاسپاۋىنان پاتەر يەلەرى كووپەراتيۆىنە سەنىم جوعالدى. بۇل ورايدا تۇرعىن ءۇيدى باسقارۋداعى رەفورمانىڭ ناتيجەسى ءبىز كۇتكەندەي بولسا قۇبا-قۇپ.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمدەۋىنشە, ەل اۋماعىندا 54 مىڭنان استام كوپقاباتتى تۇرعىن ءۇي بار. ونىڭ ىشىندە 46200 ۇيدە مۇلىك يەلەرى بىرلەستىگىن قۇرۋعا بولادى. قازىرگى تاڭدا اتالعان تۇرعىن ۇيلەردىڭ 57 پايىزىندا مۇلىك يەلەرى بىرلەستىگى قۇرىلعان. بۇل قازىردىڭ وزىندە 26597 ءۇيدىڭ تۇرعىن ءۇيدى باسقارۋدىڭ جاڭا جۇيەسىنە كوشكەنىن كورسەتەدى. سونىمەن قاتار مينيسترلىك وكىلدەرى پاتەر يەلەرى كووپەراتيۆتەرى تۇرعاندا سالاعا رەفورما ەنگىزۋدىڭ سەبەبى رەتىندە پيك جۇمىسىنىڭ اشىق جۇرگىزىلمەۋىن اتاپ ءوتتى. سوندىقتان تۇرعىن ءۇيدى باسقارۋ سالاسىن رەفورمالاۋ ماسەلەسى كورشى-قولاڭنان اسۇيدەگى اڭگىمەسىنە ءارى اسىپ, ۇكىمەت پەن پارلامەنتتەگى جيىنداردىڭ كۇن تارتىبىنە تالاي رەت قويىلعان. اقىر سوڭىندا اتقامىنەرلەر حالىققا ساپالى قىزمەت كورسەتۋگە قابىلەتسىز قۇرىلىمدى تاراتىپ, ونىڭ ورنىنا مۇلىك يەلەرى بىرلەستىگى مەن جاي سەرىكتەستىكتەر قۇرۋدى ءجون دەپ تاپتى.
ءارى تۇرعىن, ءارى توراعا
تۇرعىن ءۇي-كوممۋنالدىق شارۋاشىلىعى جاڭعىرتۋ مەن دامىتۋدىڭ قازاقستاندىق ورتالىعىنىڭ دەپارتامەنت باسشىسى مارعۇلان ابدىكارىموۆتىڭ ايتۋىنشا, جاڭا جۇيەگە ساي تۇرعىن ءۇيدى باسقارۋ ورگاندارىن قۇرۋدىڭ ءوز زاڭدىلىعى بار.
– نەگىزىنەن, مۇلىك يەلەرى بىرلەستىگىن پاتەر سانى 30-دان اساتىن كوپقاباتتى تۇرعىن ۇيلەردە قۇرعان ءجون. ال پاتەر سانى 30-عا جەتپەيتىن ۇيلەردى جاي سەرىكتەستىكتەر ارقىلى باسقارۋ وڭتايلى, – دەيدى مارعۇلان ابدىكارىموۆ.
ماماننىڭ ايتۋىنشا, مۇلىك يەلەرى بىرلەستىگى توراعاسىنىڭ سول تۇرعىن ءۇي كەشەنىندە جىلجىمايتىن مۇلىگى بولۋى كەرەك. زاڭ بويىنشا پاتەر يەلەرىنىڭ كووپەراتيۆتەرىنە ءوز قىزمەتىن 2022 جىلدىڭ 1 شىلدەسىنە دەيىن جۇرگىزۋگە رۇقسات بەرىلگەن. ءوز كەزەگىندە حالىقتىڭ سەنىمىن جوعالتپاعان پاتەر يەلەرى كووپەراتيۆى سول ۇيگە سەرۆيستىك كومپانيا نەمەسە باسقارۋشى ورگان رەتىندە قىزمەت كورسەتۋگە قۇقىلى.
ميب-ءتى مويىنداي باستادى
ەلورداداعى «ەحرو RESIDENCE» مۇلىك يەلەرى بىرلەستىگىنىڭ توراعاسى اعىن نۇكۇشەۆتىڭ ايتۋىنشا, جاڭا قۇرىلىم از عانا ۋاقىتتىڭ ىشىندە شىن مانىندە حالىقتى مويىنداتا الدى.
– وسى كوكتەمدە تۇرعىنداردان قۇرالعان باستاماشىل توپ تۇرعىن ءۇيدى باسقارۋدى ءوز قولىمىزعا الايىق دەپ شەشتىك. بۇعان دەيىن بىزگە قىزمەت كورسەتكەن سەرۆيستىك كومپانياعا حالىقتىڭ نارازىلىعى وتە كوپ بولدى. سوندىقتان تۇرعىندار ميب قۇرۋ تۋرالى باستامانى قۋانا قۇپتادى.
قازىر ءبىزدىڭ بىرلەستىككە تۇرعىن ءۇي كەشەنىندەگى 225 پاتەر قارايدى. تۇرعىندار قارسى بولعان سەرۆيستىك كومپانيانى اۋىستىرىپ, جاڭاسىمەن قىزمەت اقىسىنا بەكىتىلگەن ءتاريفتى ارزانداتۋعا قول جەتكىزدىك. سونىمەن قاتار كومپانيا وكىلدەرىنە بۇعان دەيىن تۇرعىن ۇيگە قىزمەت كورسەتكەن ۇيىمدا ەڭبەك ەتكەن بىلىكتى مامانداردى جۇمىسقا الۋ تۋرالى تالاپ قويدىق. ويتكەنى ولار ءۇيدىڭ تەحنيكالىق جاعدايىمەن جاقسى تانىس. بۇل تالابىمىز دا ورىندالدى.
جاڭا جۇيەنىڭ تاعى ءبىر ەرەكشەلىگى رەتىندە بىرلەستىك توراعاسىنا كوپتەگەن قۇزىرەتتىڭ بەرىلگەنىن ايتۋعا بولادى. ماسەلەن, مەن بىرلەستىك توراعاسى رەتىندە سەرۆيستىك كومپانيانىڭ 1 اي ىشىندە اتقارعان جۇمىسىن قابىلداۋ اكتىسىنە قول قويامىن. ال ەگەر تۇرعىنداردىڭ كومپانيا قىزمەتىنە كوڭىلى تولماسا, مەن قول قويۋدان باس تارتامىن. ءوز كەزەگىندە ولار ءتيىستى اقىسىن الا الماي قالادى. سول سەبەپتەن كومپانيا مەيلىنشە تۇرعىنداردىڭ تالاپ-تىلەگىنە قۇلاق اسادى, – دەيدى.
ارىپتەسىنىڭ بۇل پىكىرىمەن «نۇر سايا» مۇلىك يەلەرى بىرلەستىگىنىڭ ءتورايىمى ايسۇلۋ يمانبەكقىزى دا كەلىسەدى.
– ءبىز «نۇر سايا» مۇلىك يەلەرى بىرلەستىگىن العاشقىلاردىڭ ءبىرى بولىپ قۇردىق. بىرلەستىك قۇرۋدا تۇرعىنداردان جازباشا ساۋالناما الۋ قيىندىق تۋعىزدى. ويتكەنى بۇل ساۋالناما 1 ايدىڭ ىشىندە تولىق الىنۋى كەرەك. ءبىزدىڭ بىرلەستىكتە 600-گە جۋىق پاتەر مەن تۇرۋعا ارنالماعان ورىن بار. ال ولاردىڭ يەلەرىمەن كەزدەسىپ, ساۋالناما الۋ وڭاي شارۋا ەمەس.
ءوز تاراپىمىزدان تۇرعىنداردى جۇمىس بارىسىمەن تانىستىرىپ وتىرۋ ءۇشىن رەسمي سايت اشتىق. رەسمي سايتتا بىرلەستىك جۇمىسىنا قاتىستى بارلىق مالىمەتتەر اشىق كورسەتىلگەن, – دەيدى ايسۇلۋ يمانبەكقىزى.
راسىندا, قارجى-ەكونوميكامەن بىرگە, ينجەنەرلىك ينفراقۇرىلىم, قۇرىلىس سالالارىمەن بىتە قايناسىپ جاتقان تۇرعىن ءۇيدى باسقارۋدا بۇعان دەيىن اشىقتىق بولماعانى جاسىرىن ەمەس. باسقانى بىلاي قويعاندا, تۇرعىندارعا كوپ جاعدايدا پاتەر يەلەرى كووپەراتيۆىنىڭ باسشىسىمەن جۇزدەسۋدىڭ ءوزى مۇڭ بولاتىن. ويتكەنى ول كەزدەگى زاڭناماعا ساي پاتەر يەلەرى كووپەراتيۆى 10, ءتىپتى 100 تۇرعىن ۇيگە قىزمەت كورسەتۋگە قۇقىلى بولاتىن. وسىدان بارىپ ساپالى قىزمەتتەن بۇرىن پايدا تابۋدى ماقسات ەتكەن ۇيىمنىڭ جۇمىسى اقسادى. ءارى كووپەراتيۆكە قاراستى بىرەر جۇمىسشىنىڭ بىرنەشە تۇرعىن ۇيدەگى ءارتۇرلى اقاۋدى جوندەپ, رەتتەۋگە فيزيكالىق تۇرعىدان شاماسى جەتە قويمايتىنى تاعى بار. ال مۇلىك يەلەرى بىرلەستىگى تۇرعىن ۇيدەگى سۋ اققان قۇبىردى اۋىستىرۋ, توزىعى جەتكەن ەلەكتر جۇيەسىن قايتا قالپىنا كەلتىرۋ سىندى قىرۋار شارۋانى جەكە سەرۆيستىك كومپانيانى جالداۋ ارقىلى اتقارىپ شىعۋعا مۇددەلى. كومپانيا جۇمىسىن باقىلاۋدان بولەك, وعان اقى تولەۋ دە مۇلىك يەلەرى بىرلەستىگى توراعاسىنىڭ قولىنان وتەتىنىن ەسكەرسەك, كورسەتىلەتىن قىزمەتتىڭ ساپاسىنا سەنىم ارتۋعا بولادى.
سوعان قاراماستان, پيك-ءتى كەلمەسكە جىبەرگەلى تۇرعانى ميب-ءتىڭ تيىمدىلىگىنە ءادىل باعا بەرۋ ءالى ەرتەلەۋ…
