پرەزيدەنت كۇنى ەلۋ پەرزەنت دۇنيەگە كەلدى
تۇڭعىش پرەزيدەنت كۇنى قالالىق دەنساۋلىق ساقتاۋ باسقارماسىنىڭ باسشىلارى جىلداعى ءداستۇر بويىنشا ەلوردا پەرزەنتحانالارىندا بولىپ, جاس انالاردى قۋانىشتارىمەن قۇتتىقتادى. بۇل كۇنى باس قالادا 50 ءسابي دۇنيەگە كەلدى. ولاردىڭ 25-ءى قىز جانە سونشاسى ەر بالا.
الدىمەن استاناداعى №1 پەريناتالدى ورتالىققا ات باسىن بۇردىق. ساعات ون بىرلەر شاماسى بولاتىن. باس دارىگەردىڭ ورىنباسارى شولپان قوجاحمەتوۆا وسى ۋاقىتقا دەيىن 6 شاقالاقتىڭ دۇنيەگە كەلگەنىن قۋانا حابارلادى. سولاردىڭ ءبىرى الماگۇل سۇندىكەەۆا ءۇشىن بۇل كۇن ەرەكشە ەستە قالاتىنى انىق. وسىعان دەيىن تەك ءوزىنىڭ تۋعان كۇنىن اتاپ ءوتىپ كەلگەن ول بىلتىردان بەرى بۇل كۇندى تۇڭعىش پرەزيدەنت كۇنى رەتىندە مەرەكەلەسە, بۇدان بىلاي ەكىنشى قىزىنىڭ تۋعان كۇنىن دە تويلايتىنىنا قۋانىشتى ەكەنىن جاسىرمادى.
– جەلتوقساننىڭ 1-ءى كۇنى بوسانسام دەپ ارمانداعانىم راس. ءتىپتى, وتباسىمىزبەن پەرزەنتىمىزدى ءدال وسى كۇنى كۇتتىك. ەندى, مىنە, جاراتقاننىڭ جارىلقاۋىمەن ءۇش بىردەي قۋانىشقا كەنەلىپ جاتىرمىن. باقىتتىمىن, ارينە. بۇگىن كىشكەنتايلى بولعان بارلىق انالاردى دا قۇتتىقتايمىن, – دەگەن جاس انا ءسابيىن مەيىرلەنە ءبىر يىسكەدى دە, بىزبەن اڭگىمەسىن جالعاستىردى. – ءالى اتىن قويعان جوقپىز. بىراق, ءمىندەتتى تۇردە مەرەكەمەن بايلانىستىراتىن بولامىز. قالالىق دەنساۋلىق ساقتاۋ باسقارماسىنىڭ انا مەن بالا دەنساۋلىعىن ساقتاۋ ءبولىمىنىڭ مەڭگەرۋشىسى ساۋلە نۇراشەۆا بۇگىن بوسانعانداردىڭ بالالارىنا كيىم-كەشەكتەر مەن نارەستەگە قالاي كۇتىم جاساۋ كەرەكتىگى تۋرالى «قۋان, ءسابي» اتتى وقۋ قۇرالى تاراتىلعانىن جەتكىزدى. سوڭعى كەزدە استانادا بالالاردىڭ تۋ سانى كۇرت ءوستى. 2010 جىلى قالا پەرزەنتحانالارىندا دۇنيەگە كەلگەن ءسابيلەر سانى 16 مىڭنان اسسا, وتكەن جىلى 21 266 بولعان. بيىل ون ايدا كورسەتكىش 18 871-گە جەتىپ وتىر. ءتۇس اۋا قالالىق پەرزەنتحاناعا كەلدىك. بۇل جەردە 8 ءسابي ىڭگالاپ, دۇنيە ەسىگىن اشقان ەكەن. باس ءدارىگەر ەلەنا تيحوميروۆا مەن ورىنباسارى حاليدا ءشارىپوۆا ولاردىڭ انالارىن قۇتتىقتاپ, ءارقايسىسىنا سىي-سياپات تاپسىردى. بالالاردىڭ بەسەۋى قىز, ۇشەۋى ۇل. بارلىعىنىڭ دا دەنساۋلىعى جاقسى كورىنەدى. تەك, انالارى ولارعا ات قويىپ ۇلگەرمەپتى. قازاقى قالىپپەن ۇلكەندەردىڭ كەلىسىمىن كۇتىپ وتىرعان سىڭايلى. دەگەنمەن, ارالارىندا پەرزەنتىنە ەلباسىنىڭ ەسىمىن بەرگىسى كەلەتىندەر دە بارشىلىق ەكەن. ەڭ باستىسى, بوبەكتەردىڭ دەنى-قارى ساۋ بولىپ, ەل دامۋىنا ۇلەس قوسار ازاماتتار قاتارىن تولىقتىرسا دەيمىز. P.S. جالپى, تۇڭعىش پرەزيدەنت كۇنى باس قالادا 50 ءسابي تۋعان. ولاردىڭ 25-ءى قىز جانە سونشاسى ەر بالا ەكەن.
گۇلبارشىن وكەشقىزى