تۇڭعىش پرەزيدەنت كۇنى قارساڭىندا «Hilton Astana» قوناقۇيىندە ءماجىلىستىڭ باستاماسىمەن «پرەزيدەنتتىك ينستيتۋت: قازاقستاندىق ۇلگى» حالىقارالىق پارلامەنتتىك كونفەرەنتسياسى ءوتتى.
پلەنارلىق سەسسيانى قر پارلامەنت ءماجىلىسىنىڭ توراعاسى نۇرلان نىعماتۋلين اشتى. ول تۇڭعىش پرەزيدەنت كۇنى قارساڭىندا ۇيىمداستىرىلعان حالىقارالىق كونفەرەنتسيانىڭ وتە ماڭىزدى شارا ەكەنىن, ويتكەنى ءبىزدىڭ ەلىمىز جەتكەن تابىستار مەن بولاشاق جوسپارلار, تەك قانا تۇڭعىش پرەزيدەنتىمىز, ەلباسى نۇرسۇلتان ءابىشۇلى نازارباەۆتىڭ اتىمەن بايلانىستى ەكەنىن اتاپ ءوتتى. «ەلباسىنىڭ «ماڭگىلىك ەل» جولىنداعى دانا ساياساتىنىڭ ارقاسىندا كەڭ-بايتاق قازاق جەرى تاتۋلىقتىڭ ۇلگىسىنە اينالىپ, دامۋدىڭ قازاقستاندىق جولى قالىپتاستى. وسى جولدا پارلامەنت ارقاشاندا ەلباسىنىڭ سەنىمدى تىرەگى بولىپ كەلەدى» دەدى ن.نىعماتۋلين.
بۇدان ءارى قر سىرتقى ىستەر ءمينيسترىنىڭ ءبىرىنشى ورىنباسارى شاحرات تۇرىشەۆ, تۇركيا رەسپۋبليكاسى ۇلى ۇلتتىق جينالىسى توراعاسىنىڭ ورىنباسارى لەۆەنت گەك, اتلانت كەڭەسىنىڭ جەتەكشى ساراپشىسى (اقش) اريەەل كوەن, سەربيا رەسپۋبليكاسى حالىق سكۋپششيناسىنىڭ دەپۋتاتى دراگومير كاريچ ت.ب. ءسوز الىپ, قازاقستاننىڭ تاۋەلسىزدىك العان جىلداردان بەرگى حالىقارالىق جانە الەمدىك دەڭگەيدەگى جەتىستىكتەرىنە ايرىقشا نازار اۋدارا كەلىپ, ونىڭ بارلىعى مەملەكەت باسشىسى نۇرسۇلتان نازارباەۆتىڭ ساليقالى ساياساتىنىڭ ناتيجەسى ەكەنىن ايتتى.
جادىرا شامۇراتوۆا
