جەڭىس كۇنى جانە قازاقستان رەسپۋبليكاسى قارۋلى كۇشتەرىنىڭ قۇرىلعانىنا 20 جىل تولۋىنا وراي, سارىارقا اۋدانى اكىمدىگىنىڭ ۇيىمداستىرۋىمەن كوكتال تۇرعىن الابىندا مەرەكەلىك ءىس-شارا ءوتتى.
الدىمەن سارىارقا اۋدانى اكىمىنىڭ اتىنان سوعىس جانە ەڭبەك ارداگەرلەرىنە ارنالعان مەموريالدىق تاقتاعا گۇلتاج قويىلدى. شارا بارىسىندا ەكونوميكا, تەحنولوگيا جانە تاعام ءوندىرىسىن ستاندارتتاۋ كوللەدجىنىڭ ستۋدەنتتەرى ساپ جانە ءان بايقاۋىن ۇيىمداستىردى.
بايقاۋدى تاماشالاۋعا كوكتال تۇرعىن الابىنىڭ سوعىس جانە ەڭبەك ارداگەرلەرى قۇرمەتتى قوناقتار رەتىندە شاقىرىلدى. ولاردىڭ باسىم بولىگى – قالاداعى قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەنىڭ تۇرعىندارى. كوللەدج ديرەكتورى سەرىكبول شالعىمباەۆ سوعىس جانە ەڭبەك ارداگەرلەرىن قۇتتىقتاعاننان كەيىن بايقاۋعا كوللەدج اتىنان قاتىسقان 8 وقۋ ۆزۆودى سالتاناتتى شەرۋمەن ءان ايتىپ ءوتتى. ولاردى كوللەدجدىڭ العاشقى اسكەري دايىندىق جەتەكشىسى كەنجەبەك جۇماشوۆ جانە العاشقى اسكەري دايىندىق ءپانىنىڭ وقىتۋشىسى عۇمىر ەسەنالين جان- جاقتى دايىنداپ, جۇرگىزگەن بولاتىن.
ادىلقازىلار كوللەدج ستۋدەنتتەرىن ەلجاندىلىققا تاربيەلەۋ, قازاقستان رەسپۋبليكاسى قارۋلى كۇشتەرىنە ماقتانىش سەزىمدەرىن قالىپتاستىرۋ, ۇلى وتان سوعىسىنا قاتىسقان ارداگەرلەردىڭ ەرلىكتەرىنە قۇرمەتپەن قاراپ, ولارعا دەگەن سۇيىسپەنشىلىكتى ارتتىرۋ ماقساتىندا ۇيىمداستىرىلعان شارانىڭ الداعى ۋاقىتتا جالعاسىن تاباتىنىنا سەنىم ءبىلدىردى.
اتالمىش كوللەدج ۇجىمى بۇگىنگى ۇرپاققا بەيبىت ءومىر سىيلاعان قايسار جاندارعا وسىلايشا قۇرمەت كورسەتتى.شارا سوڭى ەكونوميكا, تەحنولوگيا جانە تاعام ءوندىرىسىن ستاندارتتاۋ كوللەدجىنىڭ ستۋدەنتتەرى مەن «ناز» مەملەكەتتىك بي تەاترى ارتىستەرىنىڭ كۇشىمەن ازىرلەنگەن مەرەكەلىك كونتسەرتكە ۇلاستى.
گۇلبارشىن وكەشقىزى
