قولجەتىمدى باسپانا باعدارلاماسى بايىپتالدى
قالالىق ءماسليحاتتىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ كەزەكتى وتىرىسىندا «قولجەتىمدى تۇرعىن ءۇي-2020» باعدارلاماسىن ىسكە اسىرۋ بارىسى تۋرالى ماسەلە قوزعالدى.
قالالىق تۇرعىن ءۇي باسقارماسىنىڭ باسشىسى رۋسلان احمەتوۆ ۇكىمەت قاۋلىسىمەن بەكىتىلگەن بۇل باعدارلامادا باسپانا بەرۋدىڭ ءبىرنەشە باعىتتارى قاراستىرىلعانى جونىندە ايتا كەلە, ونىڭ «قازاقستاننىڭ تۇرعىن ءۇي قۇرىلىس جيناق بانكى» اكتسيونەرلىك قوعامى جەلىسى بويىنشا, «قازاقستاندىق يپوتەكالىق كومپانيا» جانە «سامۇرىق-قازىنا» جىلجىمايتىن مۇلىك قورى», سونداي-اق, اپاتتى ۇيلەردى بۇزۋ قاناتقاقتى جوباسىن جۇزەگە اسىرۋ ارقىلى شەشىلەتىنىنە توقتالدى.
«قازاقستاننىڭ تۇرعىن ءۇي قۇرىلىس جيناق بانكى» اكتسيونەرلىك قوعامى جەلىسى ارقىلى حالىقتىڭ بارلىق ساناتتارىنا ارنالعان تۇرعىن ءۇي باعىتىمەن 2013 جىلى – 727, ال 2014 جىلى – 656 پاتەر بەرىلسە, «جاس وتباسىلارعا ارنالعان تۇرعىن ءۇي» باعىتى بويىنشا بيىل 2-14 ماۋسىم ارالىعىندا استانا قالاسى اكىمدىگى قۇجاتتار جيناۋ جۇرگىزگەنىن, ىرىكتەۋدەن وتكەندەرگە ءبىر شارشى مەترى 120 مىڭ تەڭگەنى قۇرايتىن 672 پاتەر بەرىلەتىنىن جەتكىزدى باسقارما باسشىسى. بۇل رەتتە جاس وتباسىلارعا پاتەر ساتىپ الۋ ءۇشىن 8 جىل مەرزىم ىشىندە اقشا جيناۋ مۇمكىندىگى قاراستىرىلادى, ۇيدە جەڭىلدىك شارتىمەن تۇرىپ, سودان كەيىن قارىزىن 15 جىلعا دەيىنگى مەرزىمگە ءبولىپ تولەۋگە بولادى ەكەن.
«قولجەتىمدى باسپانا-2020» باعدارلاماسىنا «سامۇرىق-قازىنا» جىلجىمايتىن مۇلىك قورى» اق-نىڭ تۇرعىن ءۇي باعىتى بويىنشا ۇمىتكەر رەتىندە جەرگىلىكتى اتقارۋشى ورگاندا كوممۋنالدىق تۇرعىن ءۇي قورىنان باسپانا الۋعا كەزەكتە تۇرعان ازاماتتار قۇجاتتارىن تاپسىرا الادى. قاتىسۋشىلاردى ىرىكتەۋ كەزەك بويىنشا جۇرگىزىلەدى. باعدارلاماعا وسى باعىت بويىنشا قاتىسۋشىلار بيىل جىل سوڭىندا قونىس تويىن تويلايتىن بولادى» دەدى ر.احمەتوۆ.
گۇلبارشىن وكەشقىزى