قۋعىن-سۇرگىن قۇرباندارىنا تاعزىم
ساياسي قۋعىن-سۇرگىن قۇرباندارىن ەسكە الۋ كۇنى ەلورداداعى «1932-1933 جىلدارداعى اشارشىلىق قۇرباندارىنىڭ رۋحىنا تاعزىم» مونۋمەنتىنە جينالعان قاۋىم قۇربانداردىڭ رۋحىنا تاعزىم ەتتى.
مونۋمەنت ماڭىنا جينالعان قاۋىم ساياسي قۋعىن-سۇرگىن قۇرباندارىن ءبىر مينۋتتىق ۇنسىزدىكپەن ەسكە الدى. سودان كەيىن نۇر-سۇلتان قالاسى اكىمدىگىنىڭ, قالالىق ءماسليحاتتىڭ, قوعامدىق ۇيىمداردىڭ وكىلدەرىمەن بىرگە ناۋبەت جىلدارى زارداپ شەككەن وتانداستارىمىزدىڭ جاقىندارى مەن تۋىستارى, اۋعان سوعىسىنىڭ ارداگەرلەرى جانە بارشا قاتىسۋشىلار اتىنان قۇرباندار مونۋمەنتىنە گۇل شوقتارى قويىلدى.
ميتينگكە قاتىسۋشىلار اراسىندا مەملەكەت تاريحى ينستيتۋتى ديرەكتورىنىڭ ورىنباسارى, تاريح عىلىمىنىڭ دوكتورى, پروفەسسور بۇركىت اياعان دا بولدى.
– بۇگىنگى كۇن, ياعني 31 مامىر ءبىز ءۇشىن ايرىقشا مانگە يە. بۇل – ناۋبەت قۇرباندارىن ەسكە الاتىن ازالى كۇن. سول ءبىر جىلدارداعى زوبالاڭ حالقىمىزدىڭ جانىنا جازىلماس جارا سالدى. ساياسي رەپرەسسيا مەن قولدان جاسالعان اشارشىلىق سالدارىنان كەم دەگەندە 1,5-2 ملن ادام قازا تاپتى. سوندىقتان تاۋەلسىز قازاقستان وسى بولعان زۇلماتتى ۇمىتپاۋى كەرەك, – دەدى بۇركىت اياعان.
زاپاستاعى پودپولكوۆنيك فەليكس دۋلسكي بولسا, زۇلمات جىلداردا اتا-اناسى مەن تۋعاندارىنا قورعان بولعان قازاق حالقىنا العىسىن جەتكىزدى.
– بۇگىندە پولياكتار, نەمىستەر, باسقا دا ۇلت وكىلدەرى ءبىر شاڭىراق استىندا تاتۋ-ءتاتتى ءومىر ءسۇرىپ جاتىرمىز. بىراق, كەزىندە بولعان قيىندىقتاردى ەستەن شىعارماۋىمىز كەرەك. اتا-بابامىزدىڭ باسىنا تۇسكەن سول ءبىر قيىن كۇندەردى, تەك قازاق حالقىنىڭ قامقورلىعى مەن قوناقجايلىلىعى ارقاسىندا امان وتكەرگەنىمىز تۋرالى ۇرپاقتارىمىزدىڭ ەسىنە سالىپ وتىرامىز. قازاقتىڭ كەڭپەيىل حالقى, كەڭ جازىق دارحان دالاسى بولماسا, تاعدىرىمىز قانداي بولاتىنىن ەلەستەتۋ قيىن. سوندىقتان زۇلمات جىلدار قايتالانباسا ەكەن, – دەدى ف.دۋلسكي.
گۇلبارشىن وكەشقىزى
