ەلورداداعى ۇلتتىق اكادەميالىق كىتاپحانادا «قۇندى تارتۋ» كىتاپ سىيلاۋ اكتسياسى باستالدى. رۋحاني وردانىڭ ون جىلدىق مەرەيتويىنا وراي ۇيىمداستىرىلعان يگى شارا جىل بويىنا جالعاسپاق.
ەلىمىزدەگى باس كىتاپحانانىڭ قورىن بايىتۋ, جۇرتشىلىقتى, اسىرەسە, جاستاردى كىتاپ وقۋعا ۇندەۋ ماقساتىنداعى شارا اياسىندا كەشەگى كۇنگە دەيىن ءارتۇرلى ۇيىمداردان مىڭعا تارتا كىتاپ سىيعا تارتىلعان. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, قازاقستان جاس كاسىپكەرلەر اسسوتسياتسياسى, شەتەلدەردىڭ ەلشىلىكتەرى مەن تۇركى اكادەمياسى تاراپىنان تارتۋ ەتىلگەن دۇنيەلەر اتاپ ايتۋعا تۇرارلىق.
جازۋشى الىبەك اسقاروۆ تا ءوزى باسقارىپ وتىرعان كىتاپحانانىڭ سورەسىنە ءوزىنىڭ بىرنەشە كىتابىن قويدى. اكتسيا شەڭبەرىندە سىيلانعان ءاربىر باسىلىم كىتاپحانا ءۇشىن ماڭىزدى.
