قۇرمانعازى وركەسترى استانادا
بۇگىن «قازاقستان» ورتالىق كونتسەرت زالىندا قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ ەل تاۋەلسىزدىگىنىڭ 25 جىلدىعىنا ارنالعان «ۇلى دالا مۇراسى» اتتى مەرەكەلىك كونتسەرتى وتەدى. وسىعان وراي كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىنە قاتىسقان وركەستر جەتەكشىلەرى ونەر ۇجىمىنىڭ جاڭالىقتارىمەن ءبولىسىپ, ەلورداداعى كەش جونىندە اقپاراتتاندىردى.
قۇرمانعازى وركەسترىنىڭ تاريحى وتكەن عاسىردىڭ وتىزىنشى جىلدارىنان تامىر تارتادى. ونىڭ باسىندا ايگىلى مۋزىكاتانۋشى, كومپوزيتور احمەت جۇبانوۆ تۇر. الايدا, قاراشاڭىراق ونەر ۇجىمى ەلوردادا العاشقى مارتە كونتسەرتىن بەرگەلى وتىر.
«وسىعان دەيىن وركەستر الەمنىڭ سەكسەننەن استام ەلىندە بولىپ, شەتەل جۇرتىن ونەرىمەن ءتانتى ەتتى. بۇل ارقىلى قازاق مۋزىكا مادەنيەتىن الەم تانىپ, وعان مەملەكەت باسشىسى «قازاقتىڭ ءىنجۋ-مارجانى» دەگەن ات بەرگەنىن وزدەرىڭىزگە ءمالىم. كۇللى الەمگە قازاقتىڭ ونەرىن تانىستىرىپ كەلە جاتقان وركەستردىڭ قازاقستانداعى ونەر ۇجىمدارىنىڭ اراسىنداعى الاتىن ورنى ەرەكشە. تاۋەلسىزدىكتىڭ جيىرما بەس جىلدىعىنا وراي ۇيىمداستىرىلعان كەشىمىزدىڭ العاشقى بولىمىندە قازاقتىڭ ءتول شىعارمالارى ورىندالاتىن بولسا, ەكىنشى بولىمىندە الەمنىڭ كلاسسيك كومپوزيتورلارىنىڭ شىعارمالارىن قازاق وركەسترى ورىندايدى» دەيدى وركەستردىڭ ديرەكتورى نۇرعيسا داۋەشوۆ.
ونىڭ ايتۋىنشا, وركەستر اراعا 18 جىل سالىپ ەكىنشى ءۇنتاسپانى شىعارعالى وتىر. رەپەرتۋارىن دا جاڭعىرتا, جاڭارتا وتىرىپ, زامان اعىمىنان قالماي العا باسۋدا.
«قازىرگى تاڭدا ءبىز رەپەرتۋاردى جان-جاقتى كەڭەيتىپ, قازاقتىڭ ءداستۇرلى مۋزىكاسىمەن قاتار, زاماناۋي جانە الەم كلاسسيكتەرىنىڭ شىعارمالارىن مۇمكىندىگىمىزشە وڭدەپ وتىرامىز. ەسكى پارتيتۋرالارىمىزدى جاڭارتىپ, ەلەكتروندى جۇيەگە كەلتىرۋ ماسەلەلەرى باستى نازاردا ۇستالىپ وتىر» دەيدى وركەستردىڭ باس ديريجەر ارمان جۇدەباەۆ.
ونەر ۇجىمىنىڭ رەپەرتۋارىنا كەلسەك, وندا قۇرمانعازىنىڭ كۇيلەرىنەن باستاپ, دينا نۇرپەيىسوۆانىڭ, ءداۋلەتكەرەيدىڭ, وزگە دە باتىس قازاقستان كۇي مەكتەبى وكىلدەرىنىڭ توكپە كۇيلەرى, ءتاتتىمبەت قازانعاپۇلى سىندى ارقا كۇيىنىڭ نەگىزىن سالعان كۇيشىلەردىڭ, احمەت جۇبانوۆ, ەۆگەني برۋسيلوۆسكي, سىدىق مۇحامەدجانوۆ, ءماكالىم قويشىباەۆ, نۇرعيسا تىلەنديەۆ, كەنجەبەك كۇمىسبەكوۆ, مىڭجاسار ماڭعىتاەۆ سىندى قازاقتىڭ كلاسسيك كومپوزيتورلارىنىڭ, سەرگەي پروكوفەۆ, ميحايل گلينكا, ارام حاچاتۋريان, دميتري شوستاكوۆيچ, پەتر چايكوۆسكي, جورج بيزە, دجواككينو روسسيني سياقتى الەم مويىنداعان كومپوزيتورلاردىڭ شىعارمالارى بار.
ەلورداداعى كەشتە وركەستردىڭ سۇيەمەلدەۋىمەن وسى كومپوزيتورلاردىڭ تۋىندىلارىن مايرا مۇحامەدقىزى, گۇلنۇر ورازىمبەتوۆا, سالتانات احمەتوۆا, باتىرجان مىقتىباەۆ, ەرلان رىسقالي, ەدىل قۇسايىنوۆ, اسەل راقىمجان, ت.ب. تانىمال انشىلەر ورىندايدى.
امانعالي قالجانوۆ