الداعى سايلاۋعا قوعامدىق مونيتورينگ جۇرگىزۋ اياسىندا نۇر-سۇلتانداعى سايلاۋدى بەيپارتيالىق بايقاۋ ورتالىعىنىڭ وكىلدەرى حالىقارالىق بايقاۋشى, تمد ميسسياسى شتابىنىڭ باسشىسى ەۆگەني كوزياكپەن بىرلەسىپ, سايلاۋ ۋچاسكەلەرىن ارالادى.
«21 جەلتوقساننان باستاپ ءبىز قازاقستانعا كەلۋدەگى باستى ميسسيامىزعا كىرىستىك. ورتالىق شتابىمىز ەلوردادا ورنالاسقان. قازىر وڭىرلەردىڭ سايلاۋعا دايىندىق جۇمىستارىمەن تانىسۋدامىز. بۇگىن نۇر-سۇلتانداعى بىرقاتار سايلاۋ ۋچاسكەلەرىنە بارۋ مۇمكىندىگى تۋدى. داۋىس بەرۋ بولمەسىندە قاجەتتى نارسەنىڭ ءبارى بار. سايلاۋشىلاردىڭ, سەنىمدى تۇلعالار مەن بايقاۋشىلاردىڭ قاۋىپسىزدىگى مەن قورعالۋى ءۇشىن قابىلدانعان ەپيدەمياعا قارسى شارالارعا نازار اۋدارۋدامىز. كابينادا پەردەلەر بولمايدى, دەگەنمەن جاسىرىن داۋىس بەرۋ ءادىسى ساقتالادى. مەنىڭشە, قاۋىپسىزدىك تولىعىمەن قامتىلعان. ءبىز داۋىس بەرۋگە قاتىساتىن بارلىق ساياسي پارتيالاردىڭ سايلاۋ شتابتارىمەن كەزدەسۋ وتكىزدىك» دەدى ەۆگەني كوزياك.
ونىڭ ايتۋىنشا, سايلاۋعا 20-عا جۋىق ديپلوماتيالىق كورپۋس وكىلدەرى ۇزاق مەرزىمدى بايقاۋشى رەتىندە تارتىلعان. سايلاۋ كۇنى بايقاۋشىلاردىڭ نەگىزگى بولىگى كەلەدى. قازىر تمد ميسسياسى شتابىنىڭ 200-دەن استام بايقاۋشىسى ورتالىق سايلاۋ كوميسسياسىندا اككرەديتتەلگەن. نۇر-سۇلتان بويىنشا 240 سايلاۋ ۋچاسكەسىندە 500 بايقاۋشى سايلاۋ بارىسىن باقىلاماق. «ءبىز بارلىق ۋچاسكەلەردى قامتىپ وتىرمىز. بارلىق بايقاۋشىلارىمىز بايقاۋشى ءتارتىبى تۋرالى كودەكسپەن تانىستى. بىزدە ارنايى جەدەل جەلى بار. ازىرگە ەلوردا بويىنشا وتىنىشتەر تۇسكەن جوق, وڭىرلەردەن كەيبىر ۋچاسكەلەردە ماجبۇرلەپ داۋىس بەرۋ فاكتىلەرى تۋرالى شاعىمدار ءتۇستى. شتاب مۇنداي جاعدايلارعا بارىنشا جاۋاپ بەرەدى. بەيپارتيالىق بايقاۋ ورتالىعىنان ءاربىر ۋچاسكەدە ەكى باقىلاۋشى بولادى» دەپ ءتۇسىندىردى بەيپارتيالىق بايقاۋ ورتالىعىنىڭ قالالىق شتاب باسشىسى تولەگەن كۇنادىلوۆ.
