استانا قالاسى ءماسليحاتى قۇرامىنداعى 25 دەپۋتاتتىڭ ءبىرى رەتىندە, قولدانىستاعى زاڭنامالار شەڭبەرىندە ەلوردانى دامىتۋ جوسپارلارىن, ەكونوميكالىق جانە الەۋمەتتىك باعدارلامالارىن, جەرگىلىكتى بيۋدجەتتى جانە ولاردىڭ اتقارىلۋى تۋرالى ەسەپتەرىن تالقىلاپ شەشۋ نەگىزگى مىندەتىمىز ەكەنىن ايتقىم كەلەدى.
سونداي-اق, تۇرعىندارمەن تۇراقتى تۇردە كەزدەسۋلەر وتكىزىپ, ولاردى مازالاپ جۇرگەن ساۋالداردىڭ شەشىمىن تابۋعا اتسالىسامىز. سايلاۋ وكرۋگىمداعى پيك باسشىلارىمەن بايلانىس بۇل جۇمىستى جەڭىلدەتەدى. اۋلانى اباتتاندىرۋ, كوشەلەردى كوگالداندىرۋ, بالالار مەن سپورت الاڭدارىن جاساۋ, ەسكى ۇيلەردى سىرۋ ماسەلەسى مەن سول ۇيلەردىڭ يەلەرىنىڭ قۇقىقتارىن قورعاۋ سياقتى ماسەلەلەر ءوز كەزەگىمەن شەشىلىپ جاتادى. تۇرعىنداردان كەلىپ تۇسكەن ارىز-شاعىمداردى قاراپ, ونى ءتيىستى اتقارۋشى ورگاندارعا جىبەرىپ, ونىڭ ورىندالۋىن قاداعالاپ وتىرامىز. دەگەنمەن, وڭ ناتيجەگە قولىمىز جەتپەي جۇرگەن جايت تا جوق ەمەس. جاقىندا, «استانا قالاسىنىڭ الەۋمەتتىك ماڭىزى بار باعىتتاردىڭ تىزبەسىن بەكىتۋ جونىندەگى شەشىمىنە وزگەرىستەر مەن تولىقتىرۋلار ەنگىزۋىن ءماسليحات وتىرىسىندا تالقىلادىق. بۇل مەن ءۇشىن دە ماڭىزدى ەدى. سەبەبى, قوعامدىق كولىكتەردىڭ باعىتى استانا مەديتسينالىق اكادەمياسىنىڭ وقۋ كورپۋستارى اراسىنان قيىستاۋ ءوتىپ, ستۋدەنتتەرىمىز قىستىڭ سۋىعى اق قار كوك مۇزدا ەكى ورتادا جاياۋ قاتىناپ ءجۇر. بۇل الداعى ۋاقىتتا شەشىمىن تابادى دەپ ويلايمىن. قالا ءماسليحاتىنىڭ رەسمي وكىلى ءارى ەلوردانىڭ باستى ءبىلىم وردالارىنىڭ باسشىسى رەتىندە ستۋدەنتتەردىڭ كاسىپتىك-بىلىكتىلىگىن دايارلاۋ, بولاشاق دارىگەرلەردى كەمەل تۇلعا ەتىپ قالىپتاستىرىپ, جاڭا ساياسي الەۋمەتتىك جاعدايدا ەلى ءۇشىن ايانبايتىن ازاماتتاردى ءتاربيەلەۋ تىكەلەي مىندەتىمىز.
بۇل ءۇشىن الدىمەن ستۋدەنتتەردىڭ جاقسى ءبىلىم الۋىمەن قاتار, الەۋمەتتىك جاعدايىنا دا ءمان بەرۋ كەرەك. استانا مەديتسينالىق ۋنيۆەرسيتەتىندە ءبىلىم الىپ جاتقان بالالار ۇيىندە تاربيەلەنگەندەرگە, قامقورشىسى جوق جاستارعا ماتەريالدىق كومەك قاراستىرىلعان. ازىق-تۇلىك الۋعا, كيىم-كەشەك تاعى باسقا قاجەتتىلىكتەرىنە قاراجات بولىنگەن. ولاردىڭ ۋنيۆەرسيتەت اسحاناسىندا تەگىن تاماقتانۋىنا جانە قوعامدىق كولىكتە ءجۇرۋ جولاقىسىن دا تولەپ وتىرمىز. مۇنداي بالالار جاتاقحانادا تەگىن تۇرادى. وسى ساناتتاعى ستۋدەنتتەردىڭ جازعى دەمالىسىن ۇيىمداستىرۋ ءبىزدىڭ مىندەتىمىزگە كىرەدى. مۇنداي جەڭىلدىكتەردى بارلىق وقۋ ورىندارىنىڭ باسشىلارى قاپەرىنە السا ءجون بولار ەدى.
دەپۋتات جۇمىسىنىڭ ءناتيجەسىن قالاي باعالاۋعا بولادى؟ سايلاۋ وكرۋگىندا ءۇش ورتا مەكتەپپەن بىرگە, قازاق ۇلتتىق ونەر ۋنيۆەرسيتەتى, پوليتەحنيكالىق كوللەدج بار. دەمەك, سايلاۋشىلاردىڭ باسىم كوپشىلىگى – جاستار. وسكەلەڭ ۇرپاقتىڭ تاربيەسى دە ءبىزدىڭ جاۋاپتى سالامىز دەپ ايتۋعا بولادى. وسى رەتتە, وسكەن ۇياسى مەن قالاسىن ءسۇيىپ, تۋعان ەلىنىڭ تاريحىن ءبىلىپ, ءومىر ءسۇرىپ جاتقان قوعامىنىڭ العا وزۋىنا ات سالىساتىن ازاماتتاردى قالاي قالىپتاستىرامىز؟ جالاڭ سوزدەردىڭ ۋاقىتى ارتتا قالدى. ناقتى قامقورلىعىمىزدى سەزىنىپ, وزدەرى سول ورتانىڭ ءبىر بولشەگى ەكەنىن بار بولمىسىمەن ۇعىنعاندا عانا كەلەشەكتىڭ كەمەل ۇرپاقتارىنا سەنىمدى بولا الامىز.
شىنىن ايتۋ كەرەك, قالا تۇرعىندارى وتە بەلسەندى, ولار وزدەرىنىڭ ازاماتتىق كوزقاراسىن اشىق ايتىپ, ءوز ءمۇددەلەرىن تالاپ ەتە الادى. ەلوردا دا ءوتىپ جاتقان ءتۇرلى ساياسي شارالارعا بەلسەندى ارالاسۋى ولاردىڭ ازاماتتىق ۇستانىمىنىڭ ۇشتالۋىنا جاقسى ىقپالىن تيگىزىپ جاتىر. كەز كەلگەن ءىستى بىرلەسە اتقارىپ, ورتاق مۇددەگە جۇمىلاتىن وسىنداي سايلاۋشىلارىمىز ءبىزدىڭ قىزمەتىمىزدەن بىلىكتىلىكتى تالاپ ەتەدى.
ءماجيت شايداروۆ,
استانا قالاسى ءماسليحاتىنىڭ دەپۋتاتى
