استانا قالاسىنىڭ تەكسەرۋ كوميسسياسىنىڭ كەزەكتى وتىرىسىندا سۋمەن جابدىقتاۋ, سۋ قۇبىرى جانە سۋاعار, گازداندىرۋ جۇيەسىن دامىتۋعا باعىتتالعان بيۋدجەت قارجىسىن ءتيىمدى پايدالانۋ بارىسى سارالاندى.
جيىندا استانا قالاسى ءماسليحاتىنىڭ دەپۋتاتتارى وفلاين جانە ونلاين قاتىستى. وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى مەن ەكولوگياعا قاتىستى قوعامدىق ۇيىم باسشىلارى ارنايى كەلدى.
تەكسەرۋ كوميسسياسىنىڭ مۇشەسى ەگور لەبو مەملەكەتتىك اۋديت جانە قارجىلىق تەكسەرۋدە بىرقاتار كەمشىلىك انىقتالعانىن اتادى.
– باسقارما جانە وعان ۆەدومستۆولىق باعىنىستاعى «Elorda Eco System» شجق مكك-ءنىڭ قۇجاتتارى ايقىندالعان مىندەتكە ساي بولعانىمەن, سۋمەن جابدىقتاۋ, سۋ قۇبىرى, نوسەر كاناليزاتسيا جانە گازداندىرۋ جۇيەسىن دامىتۋ قىزمەتتىن جوسپارلاۋ مەن ىسكە اسىرۋدا كەمشىلىكتەر ورىن الدى. ماسەلەن, بيۋدجەت باعدارلاماسىن ازىرلەۋ بارىسىندا ءتيىستى جوسپارلاۋدىڭ جوقتىعى انىقتالدى. ياعني باعدارلامانىڭ تۇپكىلىكتى كورسەتكىشى بولماۋى سەبەبىنەن بيۋدجەت قاراجاتىن جۇمساۋداعى تيىمدىلىگىن باعالاۋ مۇمكىندىك بەرمەدى. سونىڭ سالدارىنان 60 687 187,3 مىڭ تەڭگەگە قاراجات ءتيىمسىز جوسپارلاندى.
سونداي-اق گاز تاسىمالداۋ جۇيەسىن دامىتۋعا باعىتتالعان بيۋدجەت قاراجاتىن ءتيىمسىز پايدالانۋ فاكتىسى تىركەلدى. ماسەلەن, قاردى قايتا وڭدەۋ ءۇشىن قاجەتتى سۇيىتىلعان گازدى ساتىپ الۋعا جۇمسالاتىن شىعىس قار پوليگونىنداعى قاردىڭ ۇقساس مولشەرىن كادەگە جاراتۋ شىعىسىنان 3,2 ەسە كوپ. ونىڭ ۇستىنە, قاردى ەرىتۋ ءۇشىن سۇيىتىلعان گاز سياقتى قالپىنا كەلمەيتىن تابيعي رەسۋرستى پايدالانۋ «جاسىل ەكونوميكا» قاعيداسىنا سايكەس كەلمەيدى, – دەدى بايانداماشى.
«Elorda Eco System» شجق مكك نوسەرلى كاناليزاتسياسىنىڭ جۇيەسىنە قىزمەت كورسەتۋدى, كۇتىپ ۇستاۋدى جانە پايدالانۋدى جۇزەگە اسىرادى. استانا قالاسىندا نوسەرلى كاناليزاتسياسى جۇمىس ىستەۋىنىڭ نەگىزگى ماسەلەسىن اتايتىن بولساق, جەكەلەگەن سورعى ستانتسياسى مەن تازارتۋ قۇرىلىسىنىڭ جوبالىق قۋاتى جەتكىلىكسىز دەڭگەيدە, تازارتۋ قۇرىلىسىنا قوسىلماعان كوللەكتوردىڭ بولۋى جانە قالانىڭ جەكەلەگەن ۋچاسكەسىندە نوسەرلى كاناليزاتسياسى جوق.
– «Elorda Eco System» كومپانياسى مەملەكەت اكتيۆىنىڭ 1 175 563,1 مىڭ تەڭگەنى ءتيىمسىز پايدالانعانى انىقتالدى. اتاپ ايتساق, كومپانيانىڭ جارعىسىندا كوزدەلمەگەن قىزمەتتى جاساۋ, بۋحگالتەرلىك ەسەپتىڭ بۇزىلۋى, ءىسساپار شىعىسىنا نورماتيۆتەن تىس قارجى جۇمساۋ, ەڭبەكاقى تولەۋ جانە كادردى ىرىكتەۋ بويىنشا كەمشىلىكتەر بار, – دەدى ەگور لەبو.
باسقارما باسشىسىنىڭ ورىنباسارى ەرلان سىزدىقوۆ اۋديت قورىتىندىسى بويىنشا بەلگىلەنگەن تاپسىرما مەن ۇسىنىمدار ۋاقىتىلى ورىندالاتىنىن ايتتى.
ال كوميسسيا توراعاسى ءيمانجۇسىپ اقپومباەۆ بيۋدجەتتىڭ ءاربىر تيىنىن ءتيىمدى جۇمساپ, حالىقتىڭ ءومىر ءسۇرۋ ساپاسىن ارتتىراتىن باستامالاردى ساپالى اتقارۋدى تاپسىردى.
