قازاقستان مەن لاتۆيا اراسىنداعى ساۋدا اينالىمىن 500 ميلليون دوللارعا جەتكىزۋ قاجەت. كەشە اقوردادا ەلىمىزگە رەسمي ساپارمەن كەلگەن لاتۆيا رەسپۋبليكاسىنىڭ پرەزيدەنتى اندريس بەرزينشپەن كەزدەسكەننەن كەيىنگى ءباسپاسوز ءماسليحاتىندا ەلباسى نۇرسۇلتان نازارباەۆ وسىلاي دەدى دەپ حابارلادى «قازاقپارات» اگەنتتىگى.
«بارلىق دەڭگەيدە تۇراقتى جانە جەمىستى ديالوگ ورناپ كەلەدى. ساۋدا-ەكونوميكالىق ىنتىماقتاستىق جونىندە دە مەملەكەتارالىق كوميسسيا جۇمىس ىستەيدى. تەك بىلتىرعى جىلدىڭ ىشىندە ەكى ەلدىڭ اراسىنداعى تاۋار اينالىمى 50 پايىزعا ءوستى» دەدى ەلباسى. مەملەكەت باسشىسىنىڭ اتاپ وتۋىنشە, قازىرگى ۋاقىتتا ەكى ەلدىڭ اراسىنداعى ساۋدا-ساتتىق كولەمى 350 ملن دوللارعا جەتىپ وتىر. كەزدەسۋ بارىسىندا ەكى ەلدىڭ پرەزيدەنتتەرى بۇل كورسەتكىشتى تاياۋ ارالىقتا جارتى ملرد. دوللارعا جەتكىزۋ ماسەلەسىن قوزعاعان. «وسى ورايدا قازاق-لاتىش بيزنەس فورۋمىنىڭ بۇگىن استانادا, ەرتەڭ الماتىدا ءوتۋى ەكى ەلدىڭ اراسىنداعى بيزنەس قاتىناستاردى نىعايتادى دەپ سەنەمىن» دەدى ەلباسى.
ايتا كەتەيىك, 1993-2012 جىلدار ارالىعىندا لاتۆيادان ەلىمىزگە كەلگەن تىكەلەي ينۆەستيتسيا كولەمى 38,2 ملن اقش دوللارىن قۇرايدى. قازاقستاندا لاتۆيالىق كاپيتالدىڭ قاتىسۋىمەن 138 بىرلەسكەن كاسىپورىن جۇمىس ىستەيدى. ولاردىڭ باسىم بولىگى ساۋدا, قارجى ۇيىمدارىنا كەڭەس بەرۋ, كاسىبي, عىلىمي جانە تەحنيكالىق قىزمەتتەر سالاسىندا جۇمىس ىستەيدى.
ەركەجان ساتىمبەك
