ەل ەكونوميكاسىنىڭ دامۋىنا ۇلەس قوساتىن, مەملەكەتتىڭ تىرەگى بولارلىق بىلىكتى كاسىبي مامانداردىڭ قاي جەردە دە زارۋلىگى انىق بايقالۋدا. كەيىنگى كەزدە وسى ولقىلىقتىڭ ورنىن تولتىرۋعا باعىتتالعان يگى شارالار جۇيەلى تۇردە قولعا الىنا باستادى.
سونىڭ ءبىر دالەلى – ەلورداداعى №71 مەكتەپ-ليتسەيدە مەكتەپ ءبىتىرۋشى تۇلەكتەر مەن ءبىلىم بەرۋ ۇيىمدارىنىڭ, ۇلتتىق كومپانيالار مەن قالاداعى كوللەدج باسشىلارىنىڭ كەزدەسۋى بولدى. باسقوسۋدا ماماندىقتى دۇرىس تاڭداۋعا بايلانىستى وي-پىكىرلەر ايتىلىپ, ونىڭ ومىرلىك ماڭىزى تۋرالى جان-جاقتى اڭگىمە ءوربىدى.
«بۇگىنگى جاستار اراسىنداعى باستى ماسەلە جۇمىسسىزدىق بولىپ وتىر. بۇل, ەڭ ءبىرىنشى كەزەكتە – جاستاردىڭ ەڭبەك نارىعىندا سۇرانىسى جوق ماماندىققا وقۋىنان بولاتىن كەلەڭسىزدىك. بۇگىنگى كەزدەسۋدىڭ ماقساتى دا جىگىتتەر مەن قىزداردى وسىنداي سۇرانىسى جوق كاسىپتەردى تاڭداپ, ەرتەڭ جۇمىسسىز قالۋدان ساقتاندىرىپ, ەسەسىنە ولاردى تەحنيكالىق ماماندىقتاردى كوبىرەك مەڭگەرۋگە ۇگىتتەۋ» دەدى استانا قالاسىنىڭ جاستار ساياساتىن قولداۋ مەملەكەتتىك قورىنىڭ ديرەكتورى ب.جۇنىسبەكوۆ.
استانا قالاسى اكىمدىگى جۇمىسپەن قامتۋ ورتالىعىنىڭ ديرەكتورى و.وماردىڭ ايتۋىنشا, بۇگىندە ون ءبىرىنشى سىنىپ وقۋشىلارىن تەحنيكالىق ماماندىقتار بويىنشا وقىتاتىن ارناۋلى باعدارلاما جۇزەگە اسىرىلىپ جاقتان كورىنەدى.
«بۇل بويىنشا ون ايدىڭ ىشىندە كوللەدجدە وقىعاندارعا «كۇتۋ بويىنشا كىشى مەيىربيكە», «بايلانىس-كابەل مونتاجداۋشىسى», «تىگىنشى» باستاپقى كاسىپتىك ءبىلىمى ديپلومى بەرىلەدى. 2014 جىلعى قىركۇيەك ايىنان 2015 جىلعى ماۋسىم ايىنا دەيىن وسى ءۇش ماماندىق بويىنشا ءجۇز ادام وقىپ جاتىر. ولارعا جۇمىس بەرۋشىلەر دە تابىلىپ وتىر» دەدى و.ومار.
كەزدەسۋگە قاتىسقان بالامالى ەنەرگەتيكا مەن مۇناي-گاز سالاسىنداعى ءىرى وتاندىق كومپانيالاردىڭ دا وكىلدەرى وقۋشىلاردىڭ سۇراقتارىنا جاۋاپ بەرىپ, ەلىمىزدىڭ جەتەكشى كاسىپورىندارىنداعى جەكە تاجىريبەلەرىمەن ءبولىستى.
ساعي ورال
