وتكەن سەنبى, جەكسەنبى كۇندەرى قالالىق اكىمدىك الدىنداعى الاڭدا ءداستۇرلى اۋىل شارۋاشىلىق جارمەڭكەسى وتكىزىلىپ, وندا اتىراۋ جانە باتىس قازاقستان وبلىستارىنىڭ تاۋار وندىرۋشىلەرى ءوز ونىمدەرىن ۇسىندى.
ەكى باتىستىق وبلىستىڭ اۋىلشارۋاشىلىق ونىمدەرى ەلوردا تۇرعىندارىنا قالا نارىعىنان 15-20 پايىز ارزان باعامەن ۇسىنىلىپ, حالىقتىڭ مۇقتاجىن بارىنشا قامتاماسىز ەتتى. وتكەن جىلعى جارمەڭكەدە تۇتىنۋشىلاردىڭ جوعارى سۇرانىسىنا يە بولعان اتىراۋ بالىعىنا كەزەككە تۇرۋشىلاردىڭ قاراسى بيىل دا كوپ بولدى.
جارمەڭكەگە ات باسىن بۇرعان استانا قالاسىنىڭ اكىمى يمانعالي تاسماعامبەتوۆ: «بۇگىن ەلوردامىزعا الىستان ات ارىتىپ ەلىمىزدىڭ ەكى ۇلكەن وبلىسى كەلىپ وتىر. «تويدىڭ بولعانىنان بولادىسى قىزىق» دەگەن ءسوز بار. وسىلاي ۇلكەن دارەجەدە ۇيىمداستىرۋ ءۇشىن ءاربىر ولكەدە ۇلكەن دايىندىق وتەدى. وبلىستان بولەك اۋدان اكىمدەرىنىڭ, شارۋا قوجالىقتارىنىڭ ەڭبەكتەرى ەلەنۋى ءتيىس» دەدى.
جارمەڭكەگە ەكى وبلىس 600 توننادان استام ازىق-تۇلىك ونىمدەرىن جەتكىزدى. سونىڭ ىشىندە 60 توننا بالىق, 540 تونناداي كارتوپ پەن كوكونىس جانە 35 توننادان استام ەت ونىمدەرى ساۋداعا سالىندى.
جارمەڭكەدە ەت پەن بالىقتان باسقا ءسۇت, جۇمىرتقا, ۇن جانە شۇجىق, بال قاتارلى باسقا دا ءونىم تۇرلەرى حالىق يگىلىگىنە ۇسىنىلدى. جىل سايىن ءداستۇرلى تۇردە وتكىزىلەتىن بۇل جارمەڭكەنى ۇيىمداستىرۋشىلارعا ەلوردالىقتاردىڭ قاي-قايسىسى دا العىس ايتۋدان جالىعار ەمەس.
جارمەڭكە بارىسىندا ەكى وڭىردەن كەلگەن شىعارماشىلىق ۇجىمداردىڭ كونتسەرتى اشىق اسپان اياسىندا استانالىقتاردىڭ كوڭىل-كۇيىن كوتەرۋمەن بولدى. اۋەلەگەن ءان كەشكىسىن كونگرەسس-حولدا باتىسقازاقستاندىقتاردىڭ ۇيىمداستىرۋمەن دايىندالعان مەرەكەلىك شاراعا ۇلاستى.
نۇريسلام قۇسپانعالي
