كەشە تاتارستاننىڭ استاناداعى مادەني كۇندەرىنىڭ اياسىندا استانا قالاسىنىڭ اكىمى ي.ن. تاسماعامبەتوۆ پەن تاتارستان رەسپۋبليكاسىنىڭ پرەزيدەنتى ر.ن. ميننيحانوۆ كەزدەستى. كەزدەسۋ بارىسىندا ىسكەرلىك جانە مادەني-اعارتۋشىلىق سالالارداعى ەكى جاقتى ءتيىمدى سەرىكتەستىك بايلانىستار تالقىلاندى, دەپ حابارلايدى Astana.kz cايتىنان.
«تاتارستان – ءبىز ءۇشىن وتە ماڭىزدى سەرىكتەس. بۇعان تەك حالىقتارىمىزدىڭ رۋحاني ورتاق قۇندىلىقتارى عانا ەمەس, سونىمەن قاتار بەلگىلى وبەكتيۆتى فاكتورلار دا ىقپال ەتۋدە» دەدى ءوز سوزىندە استانا قالاسىنىڭ اكىمى يمانعالي تاسماعامبەتوۆ.
ءوز كەزەگىندە تاتارستان پرەزيدەنتى قازاق باۋىرلاردىڭ قۇشاق جايا قارسى العانى ءۇشىن شەكسىز العىسىن ءبىلدىرىپ, قابىلداۋشى تاراپتى تەك قانا يندۋستريا سالاسىندا عانا ەمەس, سپورت باعىتىندا دا ىنتىماقتاستىق قۇرۋعا شاقىردى.
«بۇگىن ءبىزدىڭ كوپتەگەن كومپانيالاردىڭ باسشىلارى كەلىپ وتىر, ولار قازاقستانمەن تىعىز بايلانىس ورناتقىلارى كەلەدى. ول ءۇشىن بارلىق جاعداي جاسالعان: ءبىزدىڭ مەملەكەتتەرىمىزدىڭ باسشىلارى جاقسى قارىم-قاتىناستا. قازىر بىزدەردە كەدەنمەن ەش قيىندىق جوق, بيزنەس ءۇشىن قولايلى جاعدايدىڭ بارلىعى جاسالدى» دەدى تاتارستان پرەزيدەنتى ر.ن. ميننيحانوۆ.
ايتا كەتەرلىگى, بۇكىل رەسەي فەدەراتسياسىنىڭ اۋماعىنداعى تاتارستان حالقىنىڭ ۇلەسى 2,67%-دى قۇرايدى جانە بار بولعانى 0,4% اۋماقتى الىپ جاتىر. وسىعان قاراماستان, 2013 جىلدىڭ قورىتىندىسى بويىنشا سارالاپ قاراساق, بۇكىل رەسەيدەگى سينتەتيكالىق كاۋچۋك پەن ەتيلەن پوليمەرىنىڭ (47,9%) جارتىسىنا جۋىعى, جۇك ماشينالارى (29,7%) مەن دوڭعالاقتاردىڭ (28,9%) ۇشتەن بىر بولىگى, سينتەتيكالىق جۋعىش زاتتاردىڭ 11,4 پايىزى تاتارستاندا شىعارىلادى.
فەدەرالدىق اۋقىمداعى قۇرىلىستاردىڭ 5%-ى ايماققا سالىنىپ جاتىر. ال, اۋىلشارۋاشىلىعى ونىمدەرىنىڭ جالپى سوماسى 160 ملرد تەڭگەنى قۇرايدى. ءبىر سوزبەن ايتقاندا, تاتارستان رەسەي فەدەراتسياسى سۋبەكتىلەرىنىڭ اراسىندا ەڭ قارقىندى دامۋ كورسەتكىشتەرىنە يە.
كەشە استاناداعى تاتارستاننىڭ مادەني كۇندەرى اياسىندا ەكى جاقتىڭ ىسكەرلىك ورتا وكىلدەرى قاتىسقان بىرقاتار كەزدەسۋلەر ءوتتى. شاراعا استانا مەن تاتارستان رەسپۋبليكاسىنىڭ وندىرىستەرى مەن مەملەكەتتىك مەكەمەلەرى قاتىستى. فورۋم ناتيجەسىندە بىرقاتار كەلىسسوزدەرگە قول قويىلدى, كوپتەگەن قاتىسۋشىلار وزدەرىنە سەرىكتەس تاپتى.
بۇل جاعىنان العاندا تاتار دەلەگاتسياسىنىڭ ساپارى الداعى ۋاقىتتاعى ەكى جاقتى قارىم-قاتىناستىڭ دامۋىنا كۇشتى سەرپىن بەردى دەۋگە بولادى.
