كەشە «قاينار» تۇرعىن ءۇي كەشەنىندە ۇوس ارداگەرلەرى, تىل ەڭبەككەرلەرى جانە زەينەتكەرلەرگە ارنالعان «كۇيشى دينا» اتتى شاعىن ورتالىقتىڭ سالتاناتتى اشىلۋ ءراسىمى ءوتتى.
الماتى اۋداندىق ارداگەرلەر ۇيىمىنىڭ بۇل باستاماسى بىلتىرعى كۇزدە قولعا الىنعان دا, كۇيشى دينا كوشەسىندەگى ارنايى ورىن قاڭتار ايىندا پايدالانۋعا بەرىلگەن ەكەن. ەندى مۇندا قاريالار بوس ۋاقىتتارىن كۇنىنە ەكى ساعاتتان دويبى, شاحمات, توعىزقۇمالاق, دومينو, لوتو ويناپ, كىتاپ وقىپ, مۇمكىندىگىنشە شاعىن كونتسەرتتىك باعدارلامالار قويىپ وتكىزە الادى.
جالپى, «قاينار» تك-دەگى 17 ۇيدە 3 مىڭعا جۋىق پاتەر بار. وندا 11 مىڭعا جۋىق حالىق قونىستانعان. سونىڭ ىشىنەن 150-گە تارتا ارداگەرلەردىڭ ءار كۇنىن كوڭىلدى وتكىزىپ, ءوزارا اڭگىمە-دۇكەن قۇرۋلارىنا «كۇيشى دينا» شاعىن ورتالىعى تاپتىرماس مۇمكىندىك بولعالى تۇر. بارلىق جاعداي جاسالعان. وعان بالالاردى شاقىرىپ, لەكتسيا وقىپ تۇرۋدى نيەت ەتكەن قاريالار الداعى ۋاقىتتاردا مەكتەپ, ورتا جانە جوعارى وقۋ ورىندارىمەن دە تىعىز قارىم-قاتىناس ورناتپاق.
ايگەرىم ەسماعانبەتوۆا,
ستۋدەنت
