قازاق ەلى ەگەمەندىگىن جاريالاعان سوڭ, ساياسات الەمىندە وزىندىك ءىز قالدىرعان ءۇش تۇلعاعا ەسكەرتكىش قويعان-دى. سونىڭ ءبىرى – بەسىنشى فرانتسۋز رەسپۋبليكاسىن قۇرۋشى گەنەرال شارل دە گولل ەدى. استاناداعى «پاريج ورامى» تۇرعىن ءۇي كەشەنىنىڭ جانىندا ورنالاسقان بۇل مۇسىنگە كەشە قازاقستاننىڭ سىرتقى ىستەر ۆيتسە-ءمينيسترى اقىلبەك قامالدينوۆ پەن ەلوردا اكىمىنىڭ ورىنباسارى ەرمەك امانشاەۆ باستاعان ءبىر توپ ازاماتتار گۇل شوقتارىن قويدى.
اتالمىش شارا گەنەرال شارل دە گوللدىڭ بايقوڭىر عارىش ايلاعىنا جاساعان ساپارىنىڭ 50 جىلدىعىنا ارنالدى. داڭقتى قولباسشى 1966 جىلى قازاقستانعا كەلىپ, قاسيەتتى توپىراعىمىزعا ءتاۋ ەتكەن. سول جىلى بايقوڭىر قالاسىنا تىزگىن بۇرىپ, كەڭەستىك عارىش سپۋتنيگىنىڭ ۇشۋ الاڭىنا باردى. ايتا كەتۋ كەرەك, گەنەرال – بايقوڭىر عارىش ايلاعىندا بولعان تۇڭعىش شەتەلدىك پرەزيدەنت.
– وسىناۋ سالتاناتتى جيىننىڭ استانا كۇنى قارساڭىندا ۇيىمداستىرىلعانىنا وتە قۋانىشتىمىن. شارل دە گولل ەسكەرتكىشى شاھارىمىزداعى «فرانتسۋز ورامى», «پاريج ورامى» ءتارىزدى تۇرعىن ءۇي كەشەندەرىنە ودان ءارى ءوڭ بەرىپ, سۇلۋلىققا سۇلۋلىق قوسىپ تۇرعانداي. مەن قازاقستان مەن فرانتسيا اراسىنداعى ارىپتەستىكتىڭ ارتىپ, نىعايا بەرەتىنىنە سەنىمدىمىن, – دەدى ەرمەك امانشاەۆ.
ءوز كەزەگىندە فرانتسيانىڭ قازاقستانداعى ەلشىسى فرانسيس ەتەن مەن شارل دە گولل قورىنىڭ پرەزيدەنتى جاك گودفرەن ءسوز سويلەپ, جۇرەكجاردى لەبىزدەرىن جەتكىزدى. فرانتسيالىق قوناقتار قازاقستان-فرانتسيا بايلانىسىنىڭ قازىرگى جاعدايى مەن كەلەشەگىنە توقتالىپ, ەكىجاقتى قارىم-قاتىناستان تەك وڭ سەرپىن كۇتەتىندەرىن ءبىلدىردى.
بوتاگوز ماراتقىزى
