گۇلنار قۇلىشەۆا, «استانا قالاسىنىڭ مامانداندىرىلعان سابيلەر ءۇيى» مم باس دارىگەرى
– جىل سايىن ەلىمىزدە ءداستۇرلى تۇردە پرەزيدەنت شىرشاسى اتالىپ وتەدى. سابيلەر ۇيىندە بۇل شاراعا دايىندىق بارىسى قالاي؟
– ءار بالا ءۇشىن جاڭا جىل مەيرامىنىڭ ورنى بولەك. مۇندا تاربيەلەنىپ جاتقان سابيلەر دە بۇل قۋانىشتى اسىعا كۇتەدى. جاسىنا جاس قوسقان سايىن بالالار وزدەرىنىڭ سىيلىق الاتىنىن سەزىنىپ, شىرشاعا ەرەكشە ىقىلاسپەن دايىندالادى. پرەزيدەنت شىرشاسىن
اسىعا كۇتەدى.
25 جەلتوقسان كۇنى مەكەمەدە شىرشا تويىن تويلايمىز. وعان قىزۋ دايىندىق ءجۇرىپ جاتىر. بۇل كۇنى قايىرىمدىلىق تانىتىپ, بالالارعا ءوز سىي-سياپاتىن اكەلۋشىلەر كوپ. ولاردىڭ قاتارىندا ەلشىلىك قىزمەتكەرلەرى, قالالىق اكىمدىك وكىلدەرى, استانا قالاسىنىڭ قارجى پوليتسياسى, «استانا» جۋرنالى جانە جەكە ازاماتتار دا قامقورلىق تانىتۋدى جىلداعى داستۇرگە اينالدىرىپ كەلەدى. ال قۋىرشاق تەاترىنىڭ ارتىستەرى مەن تسيرك ۇجىمى بالالاردى ارنايى قۇتتىقتاۋدى ەش ۇمىتپايدى.
– مەكەمەدە قانشا بالا تاربيەلەنىپ جاتىر؟
– بىزدە جاڭا تۋعان سابيدەن باستاپ, ءتورت جاسقا دەيىنگى 72 بۇلدىرشىن بار.
– ەلباسىنىڭ بيىلعى جولداۋىندا جەتىم بالالاردىڭ تاعدىرى نازاردان تىس قالمادى. تاستاندى سابيلەردىڭ قاتارىن ازايتۋ ءۇشىن نە ىستەۋ كەرەك دەپ ويلايسىز؟
– ەلباسى ءوزىنىڭ حالىققا ارناعان جولداۋىندا جەتىم بالالاردىڭ قوعامدا كوبەيىپ بارا جاتقانىنا الاڭداۋشىلىق ءبىلدىردى. سوندىقتان, ەڭ الدىمەن, بالا اسىراپ الۋدىڭ جولىن قاراستىرۋىمىز كەرەك.
بۇگىندە ءبىزدىڭ مەكەمەدە بالا اسىراپ الۋعا نيەت بىلدىرگەندەر سانى – ءجۇز ادام. قايىرىمدىلىق بولىمىندە ۋاقىتشا قالدىرىلعان 13 بالا بولسا, «ءۇمىت» ۇيىندە 22 بالا اناسىمەن بىرگە قامقورلىققا الىندى. بۇلاردىڭ كوبى – ءتۇرلى جاعدايلارعا بايلانىستى سابيىنەن باس تارتقىسى كەلگەندەر. ءبىز ۇگىت-ناسيحات جۇمىستارىن جۇرگىزە وتىرىپ, ءار بالانىڭ اناسىنىڭ قۇشاعىندا ءوسۋىن قۇلاققا قۇيىپ كەلەمىز. مۇمكىندىگىنشە ەكەۋىن اجىراتپاۋعا, بالاسىن تاستاپ كەتپەۋگە ىقپال ەتەمىز. ناتيجەسى دە جامان ەمەس. ماسەلەن, 2010 جىلى 11 بالا تۋعان اناسىمەن قاۋىشسا, بىلتىر 23 بالا ءوز شەشەسىمەن بىرگە بولۋ باقىتىنا بولەندى. جىل باسىنان بەرى, جالپى سانى 35 انا ءوز سابيىن قامقورلىققا الدى.
ايتا كەتەرلىگى, مۇنداعى سابيلەر ۇشىن ەڭ ۇلكەن سىيلىق «انا» دەپ ايتار ەدىم. ءتىلى شىققان بوبەكتەردىڭ بارى «مەنىڭ مامام قاشان كەلەدى؟» دەپ سۇراعاندا, نە دەپ جاۋاپ بەرەرىمدى بىلمەيمىن. سوندىقتان جۇرەگىندە جىلۋى, تاربيەلەۋگە مۇمكىندىگى بار ازاماتتار جەتىم بالالاردىڭ سانىن ازايتۋعا ۇلەس قوسسا, نۇر ۇستىنە نۇر بولار ەدى.
– راحمەت!
گۇلميرا ايماعانبەت
