سۋ قاۋپىن سپۋتنيكتەن قاداعالايدى
ەلوردانى سۋ الىپ كەتپەس ءۇشىن ونىڭ ماڭايى عارىشتان تاۋلىك بويى باقىلانىپ وتىر. «قازاقستان عارىش ساپارى» كومپانياسى ماماندارى جەردى قاشىقتىقتان باقىلايتىن قازاقستاندىق سپۋتنيكتىڭ سوڭعى مالىمەتتەرىن ۇدايى جاريالاپ كەلەدى.
ماماندار استانانىڭ ماڭايىنداعى ەلدى مەكەندەردە ەرىگەن قار سۋىنىڭ دەڭگەيىن, كولەمىن كۇندىز-ءتۇنى قاداعالاپ وتىر. بۇل سۋ باسۋ قاۋپى تۋىنداعاندا الدىن الۋ شارالارىن ۇيىمداستىرىپ, تۇرعىنداردى قاۋىپسىز جەرگە كوشىرىپ ۇلگەرۋگە ۇلكەن مۇمكىندىك ەكەنى ءسوزسىز. ايتالىق, اقمولا وبلىسى اكىمدىگىنىڭ ءباسپاسوز قىزمەتىنىڭ تاراتقان مالىمەتى بويىنشا, اعاناس اۋىلىنداعى 147 ادام قارعىن قاۋپىنە بايلانىستى باسقا جەرگە كوشىرىلگەن. بۇگىندە بۇل اۋماقتا تاۋلىك بويى ارنايى شتاب جۇمىس ىستەپ, ارنايى تەحنيكالار جۇمىلدىرىلدى.
ال عارىشتان تۇسىرىلگەن سۋرەتتەرگە باقىلاۋ جۇرگىزگەن ماماندار تايتوبە اۋىلىنا دا سۋ ءجۇرۋ ىقتيمالدىلىعىن انىقتاعان. وسىعان بايلانىستى ءتىلسىز جاۋعا قارسى جەدەل شارالار قولعا الىنىپ, بىردەن 8 مىڭ تەكشە مەتر ەرىگەن سۋ سورعىزىلعان. بۇعان قوسا, اۋىلدىڭ سۋدان قورعاپ تۇرعان بوگەتكە 830 قاپ توپىراق توگىلىپ, 4 مىڭ قاپ قۇم قۇيىلعان.
سپۋتنيكتەن تۇسىرىلگەن سۋرەتتەردەن قوسشى اۋىلىنىڭ ءوڭتۇستىگىندە قار سۋىن بوگەت ۇستاپ تۇرعانىن كورۋگە بولادى. ەگەر سۋ ونىڭ ەرنەۋىنەن اسىپ كەتەتىن بولسا, تاسقىن سۋ بىردەن استاناعا اعىلادى. بىراق بۇل جاعداي دا ءجىتى باقىلاۋدا تۇر. قوسشىنىڭ وڭتۇستىك تۇسىنا سۋدى ۇستاپ تۇراتىن قوندىرعىلاردىڭ ىرگەسىن بەكىتۋ جۇمىستارى جۇرگىزىلۋدە. بۇگىندە بۇل ماڭايعا ۇزىندىعى 600 مەترلىك 1050 قاپ توسەلدى.
استانانىڭ ىرگەسىندەگى قىزىلجار اۋىلىنىڭ بوگەتى دە بەكەمدەلىپ, وندا 950 قاپ ينەرتتىك ماتەريال توگىلدى.
اقمولا وبلىسى اكىمدىگىنىڭ باسپاسوز قىزمەتىنىڭ مالىمەتى بويىنشا, تسەلينوگراد اۋدانىنا قاراستى 11 ەلدى مەكەننىڭ بارىندە تاسقىنعا توسقىن قويۋ شارالارى جەدەل ءجۇرگىزىلىپ جاتىر. مۇنىڭ بارلىعى – استانانىڭ اۋماعىنداعى مەكەندەر. كەيبىر اۋىلداردىڭ بوگەتىنە قوسىمشا قۇرىلىستار جۇرگىزىلىپ, جىلعا, ارىق قازىلىپتى. اۋدان بويىنشا بارلىعى 523 ادام قاۋىپسىز جەرگە كوشىرىلگەن.
قىمبات نۇرعالي