استانادا قىركۇيەك ايىندا سۋعا تاريفتەر 15-20 پايىزعا وسەدى. بۇل تۋرالى «استانا سۋ ارناسى» مەملەكەتتىك كوممۋنالدىق كاسىپورنى ءمالىم ەتتى.
سۋ تۇتىنۋدى ەسەپتەۋ قۇرىلعىلارى بار جانە ادام باسىنا 3 تەكشە مەترگە دەيىن عانا سۋ پايدالاناتىن ەلوردالىقتار ەڭ تومەنگى, ياعني بۇرىنعى 34,91 تەڭگەنىڭ ورنىنا تەكشە مەترىنە 30,36 تەڭگە تاريفى بويىنشا تولەم جۇرگىزەتىن بولادى. ال, ادام باسىنا شاققاندا سۋدى 3 تەكشە مەتردەن كوپ پايدالاناتىن تۇرعىندار بۇرىنعىداي 36,43 تەڭگە ەمەس, تەكشە مەترىنە 41,9 تەڭگە تاريفىمەن (15 پايىزعا ءوستى) تولەم جۇرگىزەدى.
سۋ تۇتىنۋدى ەسەپتەۋ قۇرىلعىلارى جوقتارى قازىرگىدەي 43,72 تەڭگە ەمەس, سۋدىڭ ءاربىر تەكشە مەترى ءۇشىن 52,46 تەڭگە تولەيتىن بولادى. دەمەك, قىركۇيەكتەن باستاپ ول 20 پايىزعا وسەدى دەگەن ءسوز. بۇل سۋدىڭ ەڭ جوعارى تاريفى بولىپ سانالادى.
كارىز قىزمەتىنىڭ باعالارى جالپىعا بىردەي 24,21 تەڭگەگە دەيىن وسپەك. قازىر ونىڭ تاريفى تەكشە مەترىنە – 21,06 تەڭگە. جاڭادان وزگەرتىلەتىن تاريفتەردىڭ باعالارى كەلەسى جىلدىڭ قىركۇيەگىنە دەيىن وزگەرتىلمەيدى. كەيىن «استانا سۋ ارناسى» سۋ تاريفتەرىن كەزەكتى رەت جوعارىلاتۋدى جوسپارلاۋدا.
