وتە الىس جەرلەردە تۇراتىن تۋىستارعا, اسىرەسە, جاسى ۇلكەيگەن كىسىلەرى بار تۋىستارعا سىباعا بولىنەتىن ادەت-عۇرىپ بولعان. ونى ءىرى مالدان, ۇساق مالدان, ازىق-تۇلىكتەن بولسىن «جەڭسىك اس» دەپ بارا جاتقان ادامداردان بەرىپ جىبەرەدى نە اپارىپ بەرەدى.
ەرتەرەكتە ۇلكەندەرىمىزگە ءجون-جورالعى رەتىندە كويلەك-جاۋلىق, شاپان تارتۋ ەتىلەتىن. بەرەتىن سىباعانى ەرەكشە باپتاپ, ساقتاپ قوياتىن. ايراندى باپتاپ, اشىتىپ قۇرت جاسايتىن. كوكتەم كەزىندە دايىندالعان سارى مايدى بۇزىلماسىن دەپ قارىن مەن بۇيەندەرگە سالاتىن. مايلى سۇتتەن سارى ىرىمشىك دايىندايتىن. سارى ىرىمشىكتىڭ سارى سۋىنان «سارىسۋ» جاسايتىن. ال, سۇرلەنگەن ەتتىڭ ءجونى بولەك. ونىڭ سىيلى مۇشەلەرى مەن قازىلارىن بۇتىندەي, قوي ەتىن قارىنعا تۇزداپ, بۇرىشتاپ, الىستاعى اعايىنعا بولەك-بولەك بەرىپ جىبەرەتىن.
ءتورت تۇلىك مالدىڭ بەرەكەسى – تاتۋلىقتىڭ, سىيلاستىقتىڭ, ۇلكەندەردى سىيلاۋدىڭ, ءوسىپ كەلە جاتقان ۇرپاققا ءبىرىن-ءبىرى تۋىس-باۋىر, اعايىن, جەكجات, ناعاشى-جيەندەردىڭ تاتۋلىعىنا باستايتىن ۇلتتىق تاربيەمىزدىڭ كەرەمەت ۇلگىسى بولاتىن.
بۇگىندە استانانىڭ سۋپەرماركەتتەرىنىڭ سورەسىندە تۇرعان نارسە اۋىلدىڭ دۇكەندەرىندە دە بار. ءبىر-ءبىرىمىزدىڭ قولىمىز جەتپەيتىندەي تاڭسىق دۇنيە جوق سەكىلدى. الايدا, قالاداعىنىڭ اۋىلداعى اعايىنعا, اۋىلداعىنىڭ قالاداعى تۋىسىنا دەگەن باۋىرمالدىعى مەن سىيلاستىعىن بىلدىرەتىن قۇرمەتى ازايىپ بارا جاتقانداي. مۇندايدا سىباعا تۋرالى ايتقاننىڭ ءوزى ايىپ…
تۇيمەش بەكباساروۆا,
ارداگەر ۇستاز
