تۇڭعىش پرەزيدەنت كىتاپحاناسىندا «تاۋەلسىزدىكتىڭ مادەني نەگىزى» جوباسىنىڭ اياسىندا قازاقستاننىڭ سۋرەتشىلەر وداعىنىڭ مۇشەسى, بەلگىلى قىلقالام شەبەرى جەڭىس كاكەنۇلىنىڭ «تاڭبالى» اتتى جەكە كورمەسى اشىلدى.
«تاڭبالى» كورمەسىنىڭ تاقىرىبى» – جەڭىس كاكەنۇلىنىڭ بۇكىل شىعارماشىلىعىنىڭ ارقاۋى. قازاق حالقىنىڭ كوپ عاسىرلىق تاريحىنىڭ تاراۋلارىنىڭ ءبىرى بولىپ تابىلاتىن قولا داۋىرىندەگى جارتاستاعى سۋرەتتەردىڭ وقيعا جەلىسىنەن شابىتتانعان اۆتور ەجەلگى شەبەرلەردىڭ شىعارماشىلىعىنا قۇرمەت كورسەتە وتىرىپ, ولاردى جاڭا مازمۇنمەن تولىقتىرعان. سۋرەتشىنىڭ كارتينالارىندا وتكەن مەن بولاشاق اراسىنداعى ناقتى بايلانىس قازىرگى اسەر ارقىلى بايقالادى.
كورمەگە سۋرەتشىنىڭ 45 تۋىندىسى قويىلعان. ەجەلگى پەتروگليفتەردەن شابىتتانعان اۆتور جارتاستاعى سۋرەتتەردى اشىق تۇستەرمەن تولتىرۋ ارقىلى «جانداندىردى». «تاڭبالى» كورمەسى – ءوز تۋىندىلارىن تاستا جاساعان جانە ادامداردى, جانۋارلاردى, قازاقستاننىڭ ەجەلگى تۇرعىندارىنىڭ بۇكىل الەمىن بەينەلەگەن اتا-بابالارعا قۇرمەت.
– بۇل, بىرىنشىدەن, بايىرعى ءبادىزشى اتا-بابالار ارۋاعىنا قۇرمەت بولسا, ەكىنشىدەن, جارتاستارداعى بەينەلەردى, جازۋلار مەن تىلسىم تاريحتى زاماناۋي ونەرگە ساباقتاستىرۋ جولى. تاستاعى جازۋلار رۋحانياتىمىزعا قورعان بولدى. قازاق دالاسىنداعى پەتروگليفتەر تەك يۋنەسكو-نىڭ مادەني مۇرالارى تىزىمىنە ەنگەن «تامعالى» قورىعىندا عانا ەمەس, قارت قاراتاۋدا, ارپا وزەندە, اقباۋىر ۇڭگىرىندە, قاپشاعايدا, بايانجۇرەكتە, وزگە دە وڭىرلەردە ون مىڭداپ, ءجۇز مىڭداپ ساقتالىپ قالعان, ءالى كۇنگە دەيىن اشىق اسپان استىندا سايراپ جاتىر دەسە بولادى. وسى باعىتتا بىلىكتى مامانداردى قولداپ, ارناۋلى عىلىمي ەكسپەديتسيالار جۇمىسىن ءتيىمدى ۇيلەستىرەر بولسا, ەڭسەلى ەلىمىزگە, بايتاق جەرىمىزگە, باعا جەتپەس بايلىعىمىزعا الەم عالىمدارى مەن تۋريستەرىنىڭ قىزىعۋشىلىعى بۇگىنگىدەن دە ارتا تۇسەتىن ەدى-اۋ.
وسىناۋ مادەني مۇرامىزدى كوپشىلىككە ناسيحاتتاۋدا جەڭىس كاكەنۇلى وزىندىك قولتاڭباسىن تانىتىپ, بارشا شىعارماشىل قاۋىمعا ونەگە كورسەتە ءبىلدى, – دەدى ءماجىلىس دەپۋتاتى دارحان مىڭباي.
