جىل باسىنان بەرى استانا قالاسى ىشكى ىستەر دەپارتامەنتىنە جارىلعىش زات قويىلعانى تۋرالى 7 جالعان حابارلاما كەلىپ ءتۇستى. تەرروريزم اكتىسى بولماعانىن بىلە تۇرا, جۇرتتى اۋرە-سارساڭعا سالعان بۇزاقىلار ءىزىن سۋىتپاي انىقتالىپ, ءتيىستى جازاسىن الۋدا.
البەتتە, مۇنداي شۇعىل, جايسىز حابارلار انىق-قانىعىنا جەتكەنشە, تالايدى تىكسىنتەتىنى انىق. ويتكەنى ءبىر ەمەس, جۇزدەگەن ادامنىڭ ءومىرىن ساقتاپ قالۋ تۋرالى تاعدىرشەشتى ساتتە جايباراقاتتىق تانىتۋعا بولمايدى. تەلەفون تۇتقاسىنىڭ ارعى جاعىنداعى كىسىنىڭ ويناپ تۇرعانىن الدە شىن مانىندە قوقان-لوقى جاساپ تۇرعانىن بىردەن اجىراتۋ مۇمكىن ەمەس. الايدا, استانا قالاسىنىڭ ءتارتىپ ساقشىلارى سوڭعى 2 جىل ىشىندە اتالعان قىلمىس ءتۇرىن تولىقتاي اشكەرەلەۋگە قول جەتكىزگەنىن ايتادى.
مىسالى, بىلتىر 16 قاڭتاردا №8 ورتا مەكتەپتە جارىلعىش قۇرىلعى قويىلعانى تۋرالى حابارلاعان «تەلەفون تەرروريسى» 20 جاستاعى جۇمىسسىز جۇرگەن بوزبالا ەكەنى انىقتالدى. وقيعا ورنىنا ارنايى قۇرام, تج قۇتقارۋ قىزمەتى, جەدەل جاردەم, ورتكە قارسى قىزمەت, جەدەل تەرگەۋ توبى الىپ ۇشىپ جەتكەن.
كينولوگتار مەن جارۋشى تەحنيكتەر مەكتەپ عيماراتىن تۇگەلدەي ءتىنتىپ شىقسا دا, ەشقانداي جارىلعىش زات تابىلمادى. جەدەل-ىزدەستىرۋ شارالارىنىڭ بارىسىندا تەرروريزم اكتىسى تۋرالى حابارلاعان جىگىت 1993 جىلى تۋرعان جۇمابەك قابدەنوۆ بولىپ شىقتى. جاۋاپ الۋ بارىسىندا ول ءوز كىناسىن تولىقتاي مويىندادى. تەرگەۋ ناتيجەسى بويىنشا قر قىلمىستىق كودەكستىڭ 242-بابى, 1- تارماعى بويىنشا ءىس قوزعالدى. ول تەككە دۇرلىكتىرۋ ناتيجەسىندە مەملەكەتكە 310 مىڭ تەڭگە شىعىن كەلتىرگەن. سوت شەشىمى بويىنشا «ويناپ ءجۇرىپ, وت باسقان» جىگىت 3 جىلعا باس بوستاندىعىنان ايىرىلدى.
سول سەكىلدى, م.سادىرباەۆ دەگەن ازامات قونىس كولونياسىنا 6 اي جازاسىن وتەۋگە كەسىلدى, بۇدان بولەك ودان 394 213 تەڭگە كولەمىندە شىعىن ءوندىرىلدى.
«سودىرباەۆتىق» جاساعان سوتقار جىگىت 2013 جىلى 20 مامىردا, تاڭعى ساعات 07.00-دە كونگرەسس-حولل عيماراتىندا جارىلعىش قۇرىلعى قويىلعانى تۋرالى حابارلاعان. ەلەڭ-الاڭدا الاشاپقىن بولعان ەلوردالىق پوليتسيا قىزمەتكەرلەرى ەكى ساعات ىشىندە جامبىل وبلىسىنىڭ تۇرعىنى, 1985 جىلى تۋىلعان مۇرات سادىرباەۆتى ۇستايدى.
ءبىر قىزىعى, مۇنداي بۇزاقىلىققا بۇرىمدىلار دا بارادى. قاراعاندىنىڭ تۋماسى, 1991 جىلعى يرينا ءبليۋمنىڭ بىلتىر تامىزدا «ستۋدەنتتەر ەمحاناسى كۇل-تالقان بولادى»دەپ 102 ءنومىرىن جۇرەكسىنبەي تەرۋى اقىرى اياعىندا ءوز باسىنا پالە بوپ جابىستى. جازا باسقان «جالعان تەرروريست» 435 مىڭ تەڭگە كولەمىندە ايىپپۇل تولەپ, 1 جىلعا باس بوستاندىعىنان ايىرىلدى.
ستاتيستيكاعا سۇيەنسەك, تەرروريزم اكتىسى جونىندەگى جالعان حابارلامالاردى كوپ جاعدايدا ەسىرتكىگە ەسىرگەن نەمەسە الكوگولگە ماستانعان, پسيحولوگيالىق اۋىتقۋعا ۇشىراعان جاسوسپىرىمدەر جاسايدى.
الايدا, ءىشىنارا جەكە باس سەبەپتەرىمەن (ۇشاققا كەشىگۋ, باقتالاستارىنا نەمەسە قارىزگەرلەرىنە كەلەڭسىز ءجايت تۋدىرۋ, باسشىلىققا كەكتەنۋ, رەنجىتكەن ادامنان ءوش الۋ) نەمەسە اشەيىن تەرروريستىك قاۋىپكە ارەكەت ەتۋ جۇيەسىن تەكسەرىپ كورۋگە اۋەستىكپەن جاۋاپسىز قارەكەتكە باراتىن جاندار دا كەزدەسىپ قالادى.
قاپەرىڭىزدە ۇستاڭىز! ىشكى ىستەر دەپارتامەنتى تەرروريزم اكتىسى جونىندە جالعان حابار تاراتۋ قوعامدىق ءتارتىپ پەن قاۋىپسىزدىك قارسى قىلمىس رەتىندە قىلمىستىق كودەكستىڭ 242-بابى بويىنشا قۋدالاناتىنىن ەسكەرتەدى. قازىر اتالمىش باپ بارىنشا قاتاڭداتىلدى. بۇعان دەيىن باپ سانكتسياسى 200-دەن 500 اەك كولەمىندەگى ايىپپۇل سالىپ, 1-2 جىل تۇزەتۋ جۇمىستارىن, 6 ايلىق تۇتقىنداۋ نە بولماسا ەكى جىلعا جەتپەيتىن مەرزىمگە تۇرمەگە توعىتۋ جازاسىن قاراستىرسا, ەندى قولعا تۇسكەندى زاڭ ايامايدى: سول كولەمدەگى ايىپۇل تولەتەدى (890 مىڭ تەڭگە) نەمەسە جەتى جىلعا دەيىن باس بوستاندىعىن شەكتەۋ, التى جىلعا دەيىن باس بوستاندىعىن ايىرۋ جازاسىنا كەسەدى.
