ءدىني بىرلەستىكتەردى قايتا تىركەۋ پروتسەسىنىڭ ناتيجەسىندە ەلوردا اۋماعىندا 47 ءدىني ۇيىم جۇمىسىن جالعاستىرادى دەپ بولجانۋدا. سونداي-اق ءدىني مازمۇنداعى ماتەريالدار قۇزىرلى ورگاندارمەن بەكىتىلگەن ارنايى 55 ورىندا عانا ساتىلىپ, تاراتىلاتىن بولادى. بۇل تۋرالى استانا قالاسى اكىمدىگى جانىنداعى ءدىني بىرلەستىكتەرمەن بايلانىستار جونىندەگى كەڭەس وتىرىسىندا ءمالىم بولدى. باس قالاداعى ءدىني احۋال تۋرالى ايتىلعان جيىنعا ەلوردا اكىمىنىڭ ورىنباسارى, ءھام كەڭەس توراعاسىنىڭ ورىنباسارى ايدا بالاەۆا قاتىستى.
ءدىن ىستەرى دەپارتامەنتىنىڭ ديرەكتورى جورابەك داۋرەنوۆتىڭ مالىمدەۋىنشە, جىل باسىندا ەلوردا اۋماعىندا 55 ءدىني ۇيىم (42 بىرلەستىك پەن 13 فيليال) جۇمىس ىستەگەن. بۇگىندە «ءدىني قىزمەت جانە ءدىني بىرلەستىكتەر تۋرالى» زاڭعا سايكەس, 32 ءدىني بىرلەستىك پەن 5 فيليال قايتا تىركەۋگە قۇجات تاپسىرىپ, ءدىنتانۋ ساراپتاماسىنىڭ وڭ قورىتىندىسىنا يە بولىپ, تىركەۋدەن ءوتتى. ال بۇرىن تىركەلگەن 14 ءدىني ۇيىمنىڭ قىزمەتىن توقتاتۋ شارالارى جۇرگىزىلۋدە. سونىمەن قاتار «ازىرەت سۇلتان» مەن «تولەباي» مەشىتتەرى قازاقستان مۇسىلماندار ءدىني باسقارماسىنىڭ فيليالى رەتىندە ەسەپتىك تىركەۋگە الىنىپ, 4 ءدىني ۇيىم العاشقى تىركەۋدەن ءوتىپ جاتىر. «سونىمەن ءبىز قايتا تىركەۋ ناۋقانى ناتيجەسى بويىنشا قالادا 40 ءدىني بىرلەستىك پەن 7 فيليال قىزمەتىن جالعاستىرادى دەپ بولجاپ وتىرمىز. جىل بويىندا ءدىني بىرلەستىك وكىلدەرىمەن بىرنەشە كەزدەسۋلەر وتكىزىلىپ, قولدانىستاعى زاڭ تالاپتارىن ءتۇسىندىرۋ بويىنشا جۇمىس جۇرگىزدىك. جالپى, استاناداعى ءدىني احۋال تۇراقتى.
ەندىگى مەجە – ءدىني مازمۇنداعى ماتەريالداردى تاراتۋ ماسەلەسىن دۇرىس جولعا قويۋ. بۇل جۇمىس ءتورت كەزەڭنەن تۇرادى», دەدى ج.داۋرەنوۆ.
ەندى ءدىني باعىتتاعى كىتاپ, پاراقشالاردى قالاعان جەرىندە ساتۋمەن اينالىسقاندار جاۋاپكەرشىلىككە تارتىلادى. ماماندار «جازاعا تارتقاننان الدىن الىپ, تۇسىندىرگەن ءجون» دەگەندى نەگىزگە الىپ, اقپاراتتىق جۇمىسقا كۇش سالماق. بۇعان قوسا شاھار اۋماعىندا جۇمىس ىستەپ تۇرعان 30 قۇلشىلىق بولمەسىن زاڭ شەڭبەرىندە قالىپقا كەلتىرۋ دە جوسپاردا بار.
بولاشاقتىڭ بولجامىمەن بولىسكەن بايانداماشى باس اۋىرتقان وزەكتى ماسەلەگە دە دەن قويدى. بىرىنشىدەن, مۇسىلمان مەشىتتەرىندەگى كادر تاپشىلىعى. ەكىنشىدەن, جاستار اراسىندا الدەبىر ۇيىمدارعا «سەنۋشىلەردىڭ» كوبەيىپ كەلە جاتقاندىعى الاڭداتادى. ماماندار كورسەتكىشتىڭ كوبى كوكتال, تەمىرجولشىلار جانە قوسشى كەنتىنە تيەسىلى دەپ وتىر. «دەسترۋكتيۆتىك اعىمداردان زارداپ شەككەندەرگە كومەك كورسەتۋ ورتالىعىنا» تۇسكەن اقپاراتقا جۇگىنسەك, قالادا سوت شەشىمىمەن تىيىم سالىنعان «اتا جولى», «ال-ايات» ۇيىمدار جۇمىس ىستەپ وتىر.
كەڭەس توراعاسىنىڭ ورىنباسارى ايدا بالاەۆا ارانداتۋشىلاردىڭ ارباۋىنان امان بولۋ ءۇشىن الدىمەن, ناسيحاتتى كۇشەيتۋ قاجەتتىگىن باسا ايتتى.
– ءبىز قولدانىستاعى زاڭنىڭ تالاپتارىن حالىققا ءتۇسىندىرىپ, اقپارات بەرۋىمىز كەرەك. ەل اۋماعىندا جۇمىس ىستەۋگە تىيىم سالىنعان ءدىني ۇيىمداردىڭ ءتىزىمىن دە جاريالاۋ قاجەت. بۇل دەگەنىمىز, بىزگە ءوز جۇمىسىمىزعا كۇش سالۋىمىز كەرەك دەگەن ءسوز. ال, كادر تاپشىلىعىنا قاتىستى ايتارىم, ماسەلەنى شەشۋگە اتسالىسامىز, – دەدى ا.بالاەۆا.
كەڭەس بارىسىندا بەلگىلى بولعان تاعى ءبىر دەرەك, ەلوردالىقتاردىڭ 68 پايىزى دىنگە سەنۋشىلەر ەكەن. سونداي-اق ءدىن ىستەرى اگەنتتىگى جۇرگىزگەن ستاتيستيكا 18 مىڭ استانالىق ۇدايى جۇما نامازعا كەلەتىنىن كورسەتىپتى. بۇل قالا حالقىنىڭ 2 پايىزىن قۇراپ وتىر.
اينۇر شوشاەۆا
