كەشە نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ قازاقستان رەسپۋبليكاسىنىڭ كونستيتۋتسيا كۇنىنە وراي, قالالىق ءماسليحات اتىنان الەۋمەتتىك وسال توپتارعا جاتاتىن, تۇرمىسىندا قيىنشىلىعى بار بالالارعا, بەلسەندى تۇلەكتەرگە ارنالعان گرانتتىق وقۋ سەرتيفيكاتتارىن تابىس ەتتى.
قالالىق ءماسليحات پەن AMANAT پارتياسىنىڭ «جاستار رۋحى» جاس قاناتى بىرلەسىپ وتكىزگەن بۇل يگىلىكتى شارا اياسىندا 60 تالاپكەر «تۇران-استانا» ۋنيۆەرسيتەتىندە, تەحنولوگيالىق كوللەدجدە, سونداي-اق «استانا پروفي» قالالىق شارۋاشىلىق كوللەدجىندە قالالىق ءماسليحاتتىڭ گرانتىمەن وقۋعا مۇمكىندىك الدى.
– وتكەن جىلى ەل تاۋەلسىزدىگىنىڭ 30 جىلدىعىنا وراي, قالالىق ءماسليحات دەپۋتاتتارى «تاۋەلسىزدىكتىڭ 30 جىلدىعىنا ارنالعان 30 يگىلىكتى ءىس» دەگەن باستامانى قولعا العان بولاتىنبىز. وسى شارا اياسىندا ورتا كاسىپتىك جانە جوعارى وقۋ ورىندارىندا قالالىق ءماسليحات اتىنان ارنايى گرانت بولگەن ەدىك. ەلوردا تاريحىندا تۇڭعىش رەت اتقارىلعان بۇل جوبا اياسىندا 30 تۇلەككە ءبىلىم گرانتىن بەرگەن ەدىك. بيىل وسى يگىلىكتى باستامانى جالعاستىرىپ, گرانت الاتىن تۇلەكتەر سانىن كوبەيتىپ, 60-قا جەتكىزدىك. بۇل گرانت تەك قانا تۇرمىس جاعدايى تومەن تۇلەكتەرگە عانا ەمەس, الەۋمەتتىك ومىردە ۇلكەن بەلسەندىلىك تانىتقان تۇلەكتەرگە دە بەرىلدى, – دەدى ەرلان كاناليموۆ.
شاراعا «تۇران-استانا» ۋنيۆەرسيتەتىنىڭ, تەحنولوگيالىق كوللەدجىنىڭ باسشىلارى قاتىسىپ, تالاپكەرلەردىڭ وقۋىنا تابىس تىلەدى.
