استانادا «قولجەتىمدى تۇرعىن ءۇي – 2020» باعدارلاماسى بويىنشا ساكەن سەيفۋللين جانە شابال بەيسەكوۆا كوشەلەرىنىڭ قيىلىسىندا تاعى دا ءبىر ءۇيدىڭ قۇرىلىسى اياقتالدى. توعىز قاباتتى جاڭا تۇرعىن ۇيدە 198 پاتەر بار. ۋچاسكى باسشىسى ەرىك بايكەنوۆتىڭ ايتۋىنشا, بۇل ۇيگە ادامدار ءبىر اپتادان كەيىن قونىستانادى.
«ءۇيدىڭ قۇرىلىسى ەكى جىل بۇرىن باستالدى. ورتا ەسەپپەن ءبىر بولمەلى پاتەردىڭ اۋدانى 35 شارشى مەتر بولسا, ءتورت بولمەلىلەر – 70 شارشى مەترگە جۋىق. پاتەرلەرگە جارىق تارتىلىپ, جىلۋ قوسىلعاننان كەيىن تۇرعىندار ءوز پاتەرلەرىنە كىرەدى» دەيدى ول.
جاڭا ءۇي 74 ءبىر بولمەلى, 88 ەكى بولمەلى, 20 ءۇش بولمەلى جانە 16 ءتورت بولمەلى پاتەردەن تۇرادى. بۇگىنگى تاڭدا ءۇيدىڭ قۇجاتتارى دايىندالۋ ۇستىندە. باسپانا ساتىپ الۋشىلار مەن جالعا الۋشىلار پۋلىنىڭ قاتىسۋشىلارى تولەم قابىلەتىن قايتا راستاۋ ءۇشىن «تۇرعىن ءۇي قۇرىلىس جيناق بانكىنە» قۇجاتتار تاپسىرىپ بولدى. ەندى استانا قالاسىنىڭ تۇرعىن ءۇي باسقارماسى بانكتەن تولەم قابىلەتىن راستاعان باعدارلاما قاتىسۋشىلارىنىڭ ءتىزىمىن العاننان كەيىن ولاردى ساتىپ الۋ-ساتۋ كەلىسىمىن جاساۋ ءۇشىن شاقىرادى.
بيىل جازدا ايناكول كوشەسىندە (جۇماباەۆ پەن قورداي كوشەلەرىنىڭ اراسىندا) ورنالاسقان تاعى دا ءبىر كوپ پاتەرلى تۇرعىن ءۇي پايدالانۋعا بەرىلگەن بولاتىن.
سونىمەن قاتار, وسى جىلى استانادا «قولجەتىمدى تۇرعىن ءۇي – 2020» باعدارلاماسى اياسىندا ەۆگەني برۋسيلوۆسكي, امانگەلدى يمانوۆ جانە احمەت جۇبانوۆ كوشەلەرىنىڭ قيىلىسىندا 272 پاتەرلىك تۇرعىن ءۇي كەشەنىنىڭ قۇرىلىسى باستالدى. ونى كەلەسى جىلى اياقتاۋ جوسپارلانعان.
ال, جالپى باعدارلاما ىسكە قوسىلعالى بەرى تۇرعىن ءۇي باسقارماسى «قازاقستاننىڭ تۇرعىن ءۇي-قۇرىلىس جيناق بانكى» اق جەلىسى بويىنشا جالپى اۋدانى 84,17 مىڭ شارشى مەتردى قۇرايتىن 1581 پاتەرلىك جەتى تۇرعىن ءۇيدى پايدالانۋعا بەردى.
امانعالي شميتۇلى
