قر ۇلتتىق مۋزەيى تۇڭعىش رەت ۇيىمداستىرعان «ۇلتتىق مۇرا» اتتى اۆتوشەرۋ مارەسىنە جەتتى.
وسىعان بايلانىستى وتكەن ءباسپاسوز ءماسليحاتىندا ءسوز سويلەگەن مۋزەي ديرەكتورى دارحان مىڭباي بۇل اۆتوشەرۋ عىلىمي-زەرتتەۋ جۇمىستارىنىڭ باسى ەكەنىن اتاپ ءوتتى.
جاقىندا ۇلتتىق مۋزەي عىلىمي-زەرتتەۋ جۇمىستارىن جۇرگىزۋگە رۇقسات بەرەتىن مەملەكەتتىك ليتسەنزيا مەن عىلىمي بايقاۋلارعا قاتىسۋعا جول اشاتىن ارنايى كۋالىككە قول جەتكىزىپتى. ديرەكتوردىڭ ايتۋىنشا, ەندى مۋزەي ۇجىمى ەلىمىزدەگى ءىرى عىلىمي-زەرتتەۋ ورتالىعىن قۇرۋدى جوسپارلاپ وتىر.
استانا كۇنى قارساڭىندا اشىلعان رەسپۋبليكامىزداعى ءىرى مادەني وشاق جونىندەگى اقپارات جۇرتشىلىققا جەتۋى كەرەك. اۆتوشەرۋ ۇيىمداستىرۋدىڭ باستى سەبەبى دە وسىندا. «قۇرامىندا عالىمدار مەن مۋزەي قىزمەتكەرلەرى بار اۆتوشەرۋ ايماقتاردا ۇلتتىق مۋزەي قورىنا بىرەگەي مادەني جادىگەرلەردى وتكىزۋ جونىندە اقپاراتتىق ناسيحات جۇمىستارىن جۇرگىزىپ قانا قويماي, وزگە وڭىرلەردەگى مۋزەي قىزمەتكەرلەرىنىڭ ۇسىنىس-تىلەگىن قاعازعا ءتۇسىرىپ قايتتى» دەدى دارحان مىڭباي.
ءباسپاسوز ءماسليحاتىنا قاتىسقان مۇراپالى توپتىڭ مۇشەسى, بەلگىلى عالىم جامبىل ارتىقباەۆ الداعى اۆتوشەرۋلەر عىلىمي-زەرتتەۋ سيپاتىنا يە بولاتىنىنا سەنىم بىلدىرە كەلە, وعان ارحەولوگتار مەن ەتنوگرافتاردى دا جۇمىلدىرۋ قاجەتتىگىن جەتكىزدى.
«مادەني مۇرا» باعدارلاماسىنىڭ قابىلدانعانىنا 10 جىل تولۋىنا ءجانە ۇلتتىق مۋزەيدىڭ اشىلۋىنا وراي ۇيىمداستىرىلعان اۆتوشەرۋ بۇل جولعى ساپاردا الماتى – تاراز – شىمكەنت – تۇركىستان – قىزىلوردا – جەزقازعان – قوستاناي – كوكشەتاۋ – استانا باعىتىنداعى مادەني-تاريحي نىسانداردى ارالاپ, ورتالىق جانە وڭتۇستىك ايماقتاردىڭ مۋزەيلەرىندە بولدى.
ۇلتتىق مۋزەيدىڭ جوباسى الداعى 3 جىلعا جوسپارلانعان. 2015-2016 جىلدارى اۆتوشەرۋشىلەر ەلىمىزدىڭ شىعىس, باتىس, سولتۇستىك ايماقتارىن ارالاماق.
قىمبات نۇرعالي
