ەلوردادا شىعاتىن ونىمدەردى ناسيحاتتاۋ, كاسىپكەرلەر اراسىندا باسەكەلەستىك ورتانى قالىپتاستىرۋ, ەڭ وزىق تاۋار ءوندىرۋشىنى انىقتاۋ ماقساتىندا باس قالامىزدا بىرنەشە جىلدار كولەمىندە «استانانىڭ ۇزدىك تاۋارى» وڭىرلىك كورمە-بايقاۋى ۇيىمداستىرىلىپ كەلەدى. بۇرناعى كۇنى كونگرەسس-حولل سارايىندا بايقاۋ كەزەكتى رەت وتكىزىلىپ, 45 كاسىپكەر تۇتىنۋشىلار مەن ساراپشىلاردىڭ نازارىنا ءوز ءونىمىن ۇسىندى.
قوعامدىق ۇيىمداردىڭ, مەملەكەتتىك ورگاندار وكىلدەرىنەن جاساقتالعان كوميسسيا مۇشەلەرى تاۋارلار ساپاسىنا, ولاردىڭ سەرتيفيكاتتالۋى ولشەمدەرىنە, تۇتىنۋشىلاردىڭ پىكىرىنە قاراپ باعالادى. الدىن الا ايتايىق, بۇل جولى دا بۇرىن جەڭگەن نەمەسە جۇلدەگەرلەردىڭ قاتارىنا ەنگەن كاسىپورىندار نارىقتا تەگىننەن-تەگىن جۇرمەگەنىن دالەلدەدى. ول بايقاۋ قورىتىندىسى شىعارىلعاندا بەلگىلى بولدى. سونىمەن, جۇلدەلەر تومەندەگى ءۇش اتالىم بويىنشا ءبولىندى:
«وندىرىستىك ماقساتتاعى ۇزدىك تاۋارلار» اتالىمى:
1. «Led Solution» جشس (جارىق ءديودتى ونىمدەر ءوندىرىسى).
2. «جاركىن كو» جشس (باسپاگەرلىك قىزمەت).
3. «ەكوتون +» اق (قابىرعا بلوگتارى ءوندىرىسى).
«ۇزدىك ازىق-تۇلىك تاۋارلارى» اتالىمى:
1. «تسەسنا-استىك» كونتسەرنى» اق (ۇن, ماكارون, نان-توقاش ونىمدەرى).
2. «اپرەل» جشس (شۇجىق جانە ءتاتتى تاعامدار ءوندىرىسى).
3. «ەنەرگوسناب» جشس (الكوگولسىز سۋسىندار شىعارۋ).
«حالىق تۇتىناتىن ۇزدىك تاۋارلار» اتالىمى:
1. «التىن وردا» اۆتورلىق ديزاين ءۇيى» جشس (ۇلتتىق ۇلگىدەگى كيىم جانە جيھاز شىعارۋ).
2. «استانا قالاسىنىڭ قازاق ساڭىراۋلار قوعامىنىڭ وقۋ-وندىرىستىك كاسىپورنى» مەكەمەسى (ارناۋلى كيىم جانە كيىز ءۇي ءوندىرىسى).
3. «DONATIM» جشس (ارناۋلى كيىمدەر ءوندىرىسى).
جەڭىمپازدار كۋبوك پەن ديپلومدارمەن ماراپاتتالسا, وزگە قاتىسۋشىلارعا ديپلومدار تابىستالدى.
سونداي-اق, «ۇزدىك وندىرىستىك كاسىپورىن», «ۇزدىك يننوۆاتسيالىق كاسىپورىن» اتالىمدارىندا «Amitech Astana» جشس (پلاستيك پليتالار مەن قۇبىرلار ءوندىرىسى) مەن «نۇر» جاڭا تەحنولوگيالاردى ەنگىزۋ كلۋبى» جشس (اينەكتەن جاسالعان بۇيىمدار) جەڭىسكە جەتتى.
بايقاۋ جەڭىمپازدارى ەندى «قازاقستاننىڭ ۇزدىك تاۋارى – 2013» رەسپۋبليكالىق كورمە-بايقاۋىنا قاتىساتىن بولادى.
امانعالي قالجانوۆ
